Vaksina e Covid gati për dy javë? Rusia bën hapin e madh
Rusia po synon të bëhet shteti i parë në botë që do miratojë përdorimin e një vaksine kundër koronavirusit pas më pak se dy javësh, pavarësisht shqetësimeve për sigurinë dhe efikasitetin e saj.
Zyrtarët rusë i thanë CNN se janë duke punuar që vaksina të miratohet rreth datës 10 gusht ose edhe më herët. Vaksina është krijuar nga Instituti Gamaleya me bazë në Moskë
Këta zyrtarë thanë se përdorimi i vaksinës në fjalë do të miratohet për të gjithë, por të parët do të vaksinohen punëtorët shëndetësorë që janë në vijën e frontit në luftën kundër virusit.
“Është një moment Sputnik”, tha Kirill Dmitriev, kryetar i fondit sovran të pasurisë, që është duke e financuar hulumtimin për vaksinën, duke iu referuar lëshimit të suksesshëm të satelitit të parë në botë nga ish-Bashkimi Sovjetik në vitin 1957.
“Amerikanët ishin të befasuar kur e dëgjuan Sputnikun duke bërë zhurmë. Është e njëjta me vaksinën. Rusia do ta arrijë atë e para”, shtoi ai.
Megjithatë, Rusia deri më tani nuk ka publikuar të dhëna shkencore për testimin e vaksinës së saj dhe nuk dihet nëse ajo do të jetë efektive. Kritikët thonë se nxitimi për zbulimin e vaksinës vjen nga presioni politik i qeverisë ruse, e cila është e interesuar që ta paraqesë vendin si fuqi shkencore botërore. Për më tepër, ka shqetësime se testimi i kësaj vaksine në njerëz nuk është i kompletuar.
