Përkeqësohet gjëndja shëndetësore e grevistëve në Ballsh

Gjendja shëndetësore e naftëtarëve të Ballshit sa vjen e përkeqësohet ndërkohë që greva e tyre ka hyrë në ditën e 14.
Ata janë të vendosur që do të dalin prej saj deri kur të plotësohen kërkesat e tyre për pagat e prapambetura që prej vitit 2016.
Burime për Newsalbania.al bëjnë me dije se gjendja e tre naftëtarëve është rënduar së tepërmi dhe për këtë arsye është lejuar futja e ambulancës brenda ish- qendrës shëndetësore të uzinës për t’i transportuar ata me urgjencë drejt spitalit.
Gjendja e naftëtarëve është acaruar edhe më shumë nga zgjidhja e problemit të burgosurve të cilët disa ditë më parë hynë në grevë urie dhe dolën prej saj pasi iu plotësuan disa nga kërkesat.
Naftëtarët e Ballshit kërkojnë marrjen e pagave të prapambetura dhe rifillimin e punës së rafinerisë. Edhe pse kanë 14 ditë në grevë urie, asnjë përgjigje nuk kanë marrë nga Ministria e Energjetikës.
Në mbështetje të tyre një ditë më parë, dolën edhe naftëtarët e tjerë të cilët nuk janë në grevë duke protesta në qendër të Ballshit. Nga e hëna e javës që vjen ata kanë paralajmëruar përshkallëzim e protestave dhe paralizim të jetës në qytet, nga bllokimi i rrugëve deri tek bojkotimi i mësimit në shkolla.