Paratë ‘çmendin’ drejtorin e ujësjellësit Elton Kacidhja, 300 milionë lekë makina me qira, aferë me Sokol Zotkajn
Drejtori i Erion Veliajt në krye të ujësjellësit të Tiranës hyn në histori, bën një studim për vjedhjen e radhës, thotë se është më e leverdishme të paguash 300 milionë lekë për makina me qira se sa t’i blesh ato
Bashkia e Tiranës, sipas të gjitha indicieve, denoncimeve me fakte, raporteve të KLSH etj., është kthyer nën drejtimin e Erion Veliaj në një nga qendrat më të mëdha të korrupsionit dhe abuzimit në Shqipëri.
Në një kohë kur në Bashkinë e Tiranës po bëhen letrat për t’i dhënë Sadri Abazit tenderin me vlerë 8 milionë USD për pastrimin e ¼ të qytetit, drejtori i Ujësjellësit, Elton Kacidhja, ka shpallur një tender të ‘çmendur’, për të marrë disa makina me qira për Ujësjellësin me vlerë 300 milionë lekë.
Në vend që të blihen makinat dhe të mbeten në pronësi të shtetit, Kacidhja kërkon të shpërdorojë paratë publike, duke i ndarë me personin me të cilin ka fiksuar pazaret.
Kontrolli i Lartë i Shtetit, në disa raporte, ka denoncuar si abuzues praktikën e marrjes me qira të makinave, me vlerë që në disa raste tejkalon vlerën e vetë makinave. Megjithatë, Kacidhja thotë se ka bërë një studim, sipas të cilit është më mirë që makinat të merren me qira.
“Arsyet pse autoriteti kontraktor ka zgjedhur që të sigurojë këtë shërbim me anë të leasing, lidhet me rezultatet e studimit të bërë për avantazhet dhe disavantazhet që ofron Shërbimi Leasing. Në përfundim të studimit janë marrë treguesit, sipas të cilëve është më e leverdishme, më ekonomike dhe më efikase marrja me qira e automjeteve për plotësimin e nevojave të shoqërisë, se blerja e tyre”.
Për të hedhur poshtë konkluzionet e KLSH dhe logjikën më elementare ekonomike, Kacidhja ka bërë një studim për të pretenduar të kundërtën.
Në fakt Elton Kacidhja është ‘usta’ sa i takon abuzimit me paratë publike. Kohë më parë ai është akuzuar se ka ndarë 60 mijë USD me Sokol Zotkajn, kur Kacidhja ishte drejtor i Drejtorisë e Përgjithshme Nr.2 të Punëtorëve të Qytetit në Bashkinë Tiranë. Kacidhja i dha një tender kompanisë ‘I T E. Grup’ të Sokol Zotkajt me ofertë më të lartë, duke përjashtuar tre kompani me ofertë më të ulët. Diferenca ishte 60 mijë USD. Në këtë rast, Elton Kacidhja nuk ka pasur nevojë për ‘studim’. Pas kësaj ‘përvoje’, Veliaj i besoi ujësjellësin ku ‘llokmat’ janë më të mëdha dhe që duket që Kacidhes ia kanë marrë mend, deri kur të veprojë drejtësia.