Fier
Ditën e sotme në ambientet e Drejtorisë Vendore të Policisë Fier dhe Komisariateve në varësi të saj, u zhvillua ceremonia zyrtare e 109-vjetorit të krijimit të Policisë së Shtetit.
Në këtë ceremoni morën pjesë Prefekti i Qarkut Fier, Kryetari i Bashkisë Fier, Kryetare e Këshillit të Qarkut Fier, drejtuese e Prokurorisë Fier, drejtues të institucioneve të ndryshme ligjzbatuese, sekretare e Komisionit të Sigurisë, drejtues të komuniteteve fetare dhe familjarë të punonjësve të policisë të rënë në krye të detyrës.
Drejtori i Drejtorisë Vendore të Policisë Fier, Drejtues i Parë Alfred ÇEPE, pasi falenderoi të ftuarit dhe pjesëmarrësit, në fjalën e tij përshëndetëse, ndër të tjera u shpreh:
“Në këtë rrugë të gjatë dhe të vështirë, punonjësve të policisë u janë dashur të bëjnë shumë mund e sakrifica deri në atë më ekstremen, dhënien e jetës së tyre.
Sakrifica më sublime e dhënies së jetës në krye të detyrës, sot përjetësohet në mënyrë të lavdishme duke emërtuar 2 rrugë në fshatin Libofshë dhe Topojë me emrat e 2 dëshmorëve të Policisë, Llambri Bardhi dhe Arsen Gjini, ky emërtim u bë mbi bazën e propozimit të Drejtorisë Vendore të Policisë Fier, drejtuar Bashkisë Fier.
Këshilli Bashkiak me vendimin Nr 1 datë 05.01.2022 mori vendim për miratimin e propozimit.
Policia e Shtetit do të vazhdojë të realizojë me shumë përkushtim e devotshmëri përmbushjen e misionit fisnik për mbrojtjen e jetës dhe pronës së qytetarëve, për garantimin e rendit dhe funksionimin normal të shtetit, në luftën të pakursyer, me tolerancë zero kundër krimit në përputhje me ligjin duke respektuar liritë dhe të drejtat e njeriut si dhe parimet kushtetuese të shtetit juridik.
Gëzuar festën, duke iu përkushtuar edhe njëherë më shumë punës për një performancë sa më korrekte ndaj komunitetit dhe ligjit.
Faleminderit!”
Nga Drejtori i Përgjithshëm i Policisë së Shtetit Drejtues Madhor Gledis NANO, u akorduan dy çertifikata për shërbime të dalluara punonjësve të Policisë, Kryekomisar Erdit Rrëçeku, me detyrë Shef i Komisariatit të Policisë Fier dhe Kryekomisar Artur Shira, me detyrë Zëvëndësdrejtor i DVP Fier.
Gjithashtu, ditën e sotme drejtues të Policisë Vendore Fier dhe punonjës të Policisë morën pjesë në aktivitetin e organizuar nga Bashkia Fier për inagurimin e rrugëve me emrat e dy dëshmorëve të Policisë, rruga “Llambri Bardhi” në Libofshë dhe rruga “Arsen Gjini” në Topojë.
