Dekriminalizimi/ Vonesat në procedura mbajnë në detyrë kryebashkiakun e Mallakastrës
Nga Boldnews.al
Procesi i verifikimit mbi shkeljet e mundshme të ligjit për “Dekriminalizimin” nga ana e kryebashkiakut të Mallakastrës, Qerim Ismailaj, i dyshuar se nuk ka deklaruar një dënim penal në Greqi, kanë mbetur pezull, për shkak të vonesës së një përgjigjeje nga ana e autoriteteve greke, situatë, e cila, me shumë mundësi është diktuar nga pandemia e Covid-19.
Tre institucione shqiptare të përfshira në procesin e verifikimit, Prokuroria e Përgjithshme, Komisioni Qendror i Zgjedhjeve dhe Ministria e Drejtësisë, kanë konfirmuar për “Boldnews.al” se kanë nisur procedurat.
Por, rezultati përfundimtar mbi mandatin e Ismailajt pritet të dalë vetëm pasi Athina zyrtare të konfirmojë nëse kryetari i Bashkisë së Mallakastrës rezulton i dënuar dhe i dëbuar nga autoritetet e fqinjit jugor të Shqipërisë.
Procesi i verifikimit për Qerim Ismailaj nisi në Janar 2020, menjëherë pasi Partia Demokratike në opozitë denoncoi publikisht faktin se kryebashkiaku i Mallakastrës rezulton të jetë i dënuar në Greqi dhe më pas i dëbuar.
Ky fakt nuk është i shënuar në formularin e dekriminalizimit dhe, për Partinë Demokratike, është i mjaftueshëm që Ismailaj të shkarkohte nga posti i kryebashkiakut.
Qerim Ismailaj, nga ana e tij, e mohoi që të ketë dijeni se është dënuar. Ai deklaroi se nuk ka fshehur asgjë në të kaluar e tij dhe se gjithçka është luftë politike.
Por, përtej deklaratave publike, institucionet shqiptare nisën procesin e verifikimit, në bazë të një kërkese të Partisë Demokratike.
Verifikimi
Prokuroria e Përgjithshme, autoriteti përgjegjës për verifikimin e thelluar në bazë të ligjit “Për Dekriminalizimin”, ka kërkuar nga Komisioni Qendror i Zgjedhjeve, në 13 janar 2020, vëniën në dispozicion të formularit të dekriminalizimit të subjektit Qerim Ismailaj.
Prokuroria e Përgjithshme, siç informon zyrtarisht redaksinë e “Boldnews.al”, ka nisur procesin verifikues, bazuar në kërkesën e 500 shtetasve me të drejtë vote, të përcjellë nga Partia Demokratike.LEXO EDHE “Qeveria të garantojë masat mbrojtëse për personelin mjekësor”/ Meta reagon pas vdekjes së Dr. Pushit
Institucioni qendror i Akuzës informon se ka siguruar informacion në disa institucione publike, por ndërkohë është në pritje të përgjigjes nga ana e autoriteteve të Greqisë.
“Është marrë vendim për zgjatjen e afateve të verifikimit, pasi janë të domosdoshme të administrohen përgjigjet zyrtare të organeve të juridiksioneve të huaja”, thotë Prokuroria e Përgjithshme për “Boldnews.al”.
Përgjigjet nga ana e autoriteteve greke ende nuk kanë mbërritur. Një fakt i tillë konfirmohet nga Ministria e Drejtësisë, institucioni që koordinon kërkesat për ndihmë juridike ndërmjet autoriteteve gjyqësore shqiptare dhe atyre të huaja.
Kërkesa e Prokurorisë së Përgjithshme, “pas përkthimit në gjuhën greke është transmetuar pranë Ministrisë Greke të Drejtësisë me shkresën e datës datë 24.01.2020”, deklaron Ministria e Drejtësisë në Shqipëri për “Boldnews.al”.
Por, të paktën deri në datën 23 Qershor 2020, “nuk ka ardhur ende asnjë përgjigje nga autoritetet greke të drejtësisë, pavarësisht kërkesës rikujtuese të Prokurorisë për informacion mbi ekzekutimin e saj, transmetuar nga Ministria e Drejtësisë më datë 27.04.2020, pranë Ministrisë së Drejtësisë të Greqisë”, thotë Ministria e Drejtësisë, në komunikim me redaksinë.
Nga ana tjetër, Komisioni Qendror i Zgjedhjeve është në pritje të rezultateve të verifikimit të Prokurorisë së Përgjithshme për të marrë një vendim mbi mandatin e kryetarit të Bashkisë Mallakastër.
“Deri në këto momente, Prokuroria e Përgjithshme nuk ka përcjellë pranë Komisioni Qendror të Zgjedhjeve rezultatin për verifikimin e subjektit Qerim Ismailaj, me funksion kryetar i Bashkisë Mallakastër”, thuhet në një përgjigje për “Boldnews.al” të pak ditëve më parë. Persh:Dd
