Edhe pse nuk është e specifikuar arsyeja pse prona shtetërore i është kaluar privatit, në VKM-në e qeverisë thuhet se çmimi i shitjes është 59.565.000 lekë, ose 10 euro/m.
55 mijë metra tokë buzë detit në Hamallaj i janë dhënë bashkimit të dy kompanive private, për vetëm 10 euro metri katror. Një vendim i Këshillit të Ministrave, i firmosur nga zv.kryeministri Erion Braçe, caktoi kalimin e pronës shtetërore nga Ministria e Financave tek dy kompanitë private, “Sviluppo Mare 1 shpk” dhe “S&D Invest”. Pasuria në fjalë ndodhet në zonën Kadastrale 1925, pasuria nr 20/6 me sipërfaqe 55 mijë metra katrorë në afërsi të bregut të Detit në Durrës.
Por kush janë dy kompanitë përfituese?
Sviluppo Mare 1 shpk, dhe S&D Invest janë përfituese të truallit prej 55 mijë metra katrorë në Hamallaj, buzë detit për një çmim qesharak prej 10/euro metri, jashtë çdo reference nga tregu.
Sviluppo Mare 1., është një shoqëri me përgjegjësi të kufizuar, e përqëndruar në ndërtim dhe pasuri imobiliare. Aksioneri i Svilupo Mare 1 është Redi Peza, biznesmen i njohur në fushën e ndërtimit.
Ndërsa S&D invest është një shoqëri e shpërndarë në fokusin e aktivitetit, ku përfshihet ndërtimi, peshkimi e tregtia dhe aksioneri i saj kryesor dhe i vetëm tashmë është Gentian Sula, biznesmen i njohur.
Pas ndërtimit në Kakome, ku kompania e Sulës, Agikons pritet të përmbyllë ndërtimin e një resorti në një nga gjiret më të bukura të Jonit. 290 mijë m2 është leja, që Agikons ka marrë për të ndërtuar dhe tashmë, një tjetër tokë buzë detit i jepet privatit.
