Ka luajtur rolin e ‘Mimoza llasticës’, aktorja Zhaklina Dhimojani dhuron disa respiratorë për Spitalin ‘Shefqet Ndroqi’
Aktorja e njohur shqiptare Zhaklina Dhimojani Blättler, e cila ka luajtur rolin e “Mimoza llasticës”, ka vendosur të dhurojë për Spitalin “Shefqet Ndroqi” disa respiratorë. Lajmin e jep Ambasada Shqiptare në Bernë, Zvicër, përmes së cilës Zhaklina ka vendosur të dhurojë respiratorët për vendin e saj të origjinës.
“E larguar nga Shqipëria në vitet 90-të, Zhaklina Dhimojani Blättler, nuk e ka harruar asnjëherë vendin e saj të lindjes. Aktorja e njohur për publikun shqiptar, ka dhuruar sot përmes Ambasadës shqiptare në Bernë, disa respiratorë për Spitalin Universitar “Shefqet Ndroqi” në Tiranë, që do të ndihmojnë më tepër të prekurit nga Covid-19.
Ambasada e RSH në Bernë i shpreh falenderime dhe mirënjohje Z. Blättler, që gjatë këtyre viteve në Zvicër ka dhënë ndihmën e saj në fushën sociale, ka promovuar artin dhe kulturën tonë në Diasporë dhe ka kontribuar me donacione të ndryshme për Bashkinë e qytetit të Himarës, prej nga ajo ka origjinën”, shkruan Ambasada shqiptare në Bernë, Zvicër.
