Unioni i Gazetarëve Dega Shkodër shpreh keqardhje për ndarjen nga jeta te aktorit Anton Krosaj

NGUSHËLLIM!
Unioni i Gazetarëve Shqiptarë dega Shkodër shprehë keqardhje të madhe për humbjen para kohe në moshen 54 vjeçare të aktorit të humorit shkodran, Anton Krosaj. Nga sa mësohet, aktori shkodranë vuante nga një sëmundje e rëndë që në gjashtë muajt e fundit u përkeqësua shumë deri në ndarjen nga jeta. Ndonëse në opinionin publik njihej si aktor i Estrates Profesioniste në Teatrin Migjeni Shkodër, Anton Krosaj ishte pjesë aktive edhe e komunitetit të medias lokale në Shkodër. Për disa vite me radhë ai ka spikatur në drejtimin e emisioneve humoristike, fillimisht në televizionin Rozafa dhe më pas edhe në TV1 Channel. Sa i përket fushës së artit, Anton Krosaj u afirmua që në rininë e tij si një humorist me grupet amatore të Shkodres, ku ka debutuar në dhjetëra shfaqje në të cilat me talentin dhe pasionin e tij krijoi profilin e një humoristi të pëlqyeshem dhe me perspektive. Prej gati 10 vitesh Anton Krosaj u bë pjese e Estrades Profesioniste të Shkodrës duke interpretuar krah emrave te mëdhenj të humorit shkodran si Zyliha Miloti, Paulin Preka, Gëzim Kruja, Zef Deda, Drande Xhaj, Besnik Çinari, Muhamet Çekini etj. Krahas skenes së teatrit Migjeni, humoristi Krosaj është pjese edhe e disa prej komedive të realizuara nga RTSH me regji të Arjan Çuliqi, si “Para nga qielli”, “Piruet”, “Pesha e gruas sime”, “Pavioni zero”, “Personazhe ne kurth” etj. Ndonëse kohë pandemie, shkodranët dhe sidomos komuniteti i artistëve bënë i bënë nderimet e duhura aktorit Anton Krosaj, trupi i pajetë i të cilit qëndroi për disa minuta në hyrjen e Teatrit Migjeni ku përmes duartrokitjeve të kolegëve të tij më të afërt por edhe qytetarë të tjerë shkodranë u përcollë me shumë respekt për në banesen e fundit. Unioni i Gazetarëve Shqiptarë dega Shkodër i përcjellë ngushëllimet e sinqerta familjes “Krosaj” për humbjen e njeriut të afërt të tyre si dhe komunitetit të artistëve dhe të medias shkodrane për humbjen e kolegut të tyre të afërt. Lamtumirë kolegu ynë i nderuar, pushofsh në Paqe Anton Krosaj!
Zyra e shtypit e UGSH Shkodër, 22 korrik 2020