Ujësjellësi i Durrësit “bën kërdinë”, 4.2 miliardë vëllait të komandantit të Gardës
Këto ditë vihet re një numër i lartë i tenderave të organizuara nga ujësjellësit në rang vendi. Si duket është koha kur “pula bën vezë të arta” dhe të gjithë duhet që ta kapin gjithçka që munden. Kështu konkretisht Sh.A Ujësjellës Kanalizime Durrës ka vendosur të tregohet mjaft bujar dhe të “dhurojë” rreth 4.2 miliardë lekë të vjetra firmës e cila ofroi më shumë.
Bëhet fjalë për tenderin me numër reference REF-81177-12-04-2020 dhe me objekt “Ndërtim i rrjetit K.U.Z të fshatit Shënavlash, Bashkia Durrës”. Në tender kanë marrë pjesë 2 kompani apo bashkim kompanish, përkatësisht “Edicom” dhe “2T” me vlerë të ofruar 352,017,419 lekë pa TVSH dhe ‘’Kevin Construksion’’ me ‘’Braka Construction’’ me vlerë të ofruar 244’224’908 lekë pa TVSH.
Ndonëse këta të fundit ofruan rreth 1 miliardë lekë të vjetra pa TVSH më pak, kjo nuk u mor në konsideratë dhe fitues u shpallën “Edicom” dhe “2T” me një vlerë rreth 4.2 miliardë lekë të vjetra nëse llogarisim dhe TVSH-në. Firma “Edicom” është në pronësi të shtetasve Luigj Aleksi, Xhorxhi Aleksi, Ledia Aleksi dhe Spartak Çausholli. Ndërsa firma “2T” është në pronësi të Dritan Troksit dhe Artan Sakos. Ky i fundit është edhe vëllai i komandantit të gardës së republikës, Gramos Sako. Gjithashtu në media është aluduar edhe si “ndërtuesi i pallatit të Linda Ramës”.
Nga ana tjetër shikohet se vlera fituese është thuajse identike me fondin limit të tenderit, përkatësisht sa 96.57% e tij. Të dyja këto fakte, sugjerojnë se Ujësjellësi i Durrësit ka bërë vërtetë “kërdinë” në këtë tender. Por për sa kohë askush nuk heton, nuk mbetet gjë tjetër veçse t’i urojmë t’i shpenzojnë sa më mirë.