“U rrëzua vetë!”/ Krimi ndodhi dy netë më parë, si familjarët e viktimës fshehën vrasjen, hetimet ranë në gjurmët e autorit, Demiri: E bëra unë, kishim konflikte

Familjarët e Dorian Latollarit, 61-vjeçarit që u vra nga ‘dezertori’ Fatmir Demiri nuk e kanë denoncuar ngjarjen e ndodhur në Tiranë, në rrugën “Haxhi Hysen Dalliu”.
Mësohet se kur kanë gjetur dy netë më parë trupin e pajetë të familjarit të tyre, 61 vjeç, ata kanë vazhduar me procedurat normale të ceremonisë mortore. Ndërkohë, para autoriteteve, janë shprehur se Latollari është rrëzuar dhe se për këtë arsye ka vdekur.
“Është rrëzuar,”– mësohet të kenë thënë ata, për arsye që ende nuk dihen.
Ndërkohë, autoritetet vijuan hetimet dhe zbuluan se në fakt bëhej fjalë për një vrasje. Pas dokumentimit të ngjarjes, efektivët e komisariatit nr.3 zbarkuan ditën e sotme në shtëpinë e autorit, Fatmir Demiri, 37-vjeç dhe e vunë në pranga. Ky i fundit e ka pranuar autorësinë e ngjarjes para policëve dhe është shprehur: E bëra unë, kishim konflikte për pronat!