Tragjike në Elbasan, fëmija 3 vjeç shkon me temperaturë të lartë në spital, ndërron jetë
*Pamje ilustruese e marre nga interneti
Një ngjarje tragjike raportohet nga Elbasani. Mësohet se një fëmijë 3 vjeç ka ndërruar jetë pasi ka shkuar për ndihmë mjekësore në spital, me temperaturë të lartë.
Fatkeqësisht, bëhet me dije se i mituri ka ndërruar jetë. Pritet që në orët në vazhdim institucionet të zbardhin rastin dhe shkakun e vdekjes së fëmijës 3 vjeç, shkruan newsbomb.al. Jo zyrtarisht bëhet me dije se i mituri, mjekohej prej 4 ditësh në shtëpi.
Sipas Policisë, familjarët e kanë çuar të voglin në spitalin e qytetit në orët e para të mëngjesit, në gjendje të rëndë për jetën. Ai ka pasur temperaturë të lartë dhe simptoma të gripit stinor. I mituri është mbajtur nën vëzhgim nga mjekët e Elbasanit, por fatkeqësisht pas disa orësh ata kanë njoftuar familjarët se fëmija kishte ndërruar jetë për shkak të komplikacioneve.
Vogëlushi nga fshati Kusarth është në Pediatrinë e spitalit të Elbasanit dhe është futur në oksigjen, sepse ishte prekur nga Pneumonia bilaterale. Po ashtu ai kishte insufiçencë respiratore akute dhe insufiçencë kardiake.
“Më datë 19.01.2022, në orët e para të mëngjesit është dërguar në spitalin e Elbasanit, në gjendje të rëndë për jetën, shtetasi i mitur A. I., 3 vjeç, i cili pas disa orësh ka humbur jetën. Grupi hetimor ka kryer veprimet e para hetimore në vendngjarje dhe pritet ekspertiza mjeko-ligjore për përcaktimin e shkakut të humbjes së jetës”, njofton Policia.
