Qiejt e disa shteteve tropikale në Amerikë janë errësuar për shkak të një ere masive nga Saharaja. Autoritetet kanë apeluar mbajtjen e maskave për të evituar dëmet në shëndet duke ditur edhe lidhjen mes ndotjes dhe vdekshmërisë prej kovidit.
![](http://shtypi.net/wp-content/uploads/2020/06/406D4339-13B5-4681-B5BA-FA9123AEBA17-300x165.jpeg)
Një re masive pluhuri me origjinë nga Afrika Veriore ka mbështjellë prej ditësh shtetet tropikale që lagen nga Atlantiku duke rrezikuar shtrirjen deri në Shtetet e Bashkuara të Amerikës.
Ishujt Karaibe, Kuba, Venezuela, brigjet e Puerto Rikos dhe deri ato të Meksikës e Majamit në perëndim janë disa nga rajonet e goditura prej valës sahariane që ka rrethuar horizontet me ngjyrë të kafenjtë.
Re të tilla pluhuri krijohen zakonisht nga erërat e forta që fryjnë në shkretëtirën e Saharasë.
![](http://shtypi.net/wp-content/uploads/2020/06/82A4120E-B0FA-46C9-A1A4-DDABF4BB4CE2-300x158.jpeg)
Pluhuri dhe grimcat e ngritura në zonat afrikane transportohen më tej në lartësi të madhe me mijëra kilometra nëpër botë nga Kepi i Gjelbër në perëndim të Senegalit përtej Oqeanit Atlantik.
Grimcat e vogla shoqërohen me tharje të ajrit që sipas Ministrisë kubane të Shëndetësisë, po ulin edhe shanset për reshje teksa masa ajrore lëviz gjithnjë e më shumë drejt perëndimit.
“Nga këndvështrimi mjekësor, reja e pluhurit ndikon te njerëzit me astmë, me alergji. Personat mbi 65 vjeç dhe fëmijët nën 4 vjeç mund të pësojnë një atak astmatik, me simptoma të rënduara të frymëmarrjes, me acarim të fytit dhe me irritim të syve.”
Për popullsitë tropikale të Amerikës, era sahariane e sivjetme konsiderohet më e vështira e dekadës dhe nga më seriozet në 50 vitet e fundit, pasi ndryshe nga herët e tjera, reja e pluhurit po qëndron e dendur dhe kompakte në lëvizje, duke mos u shpërhapur e as holluar.
![](http://shtypi.net/wp-content/uploads/2020/06/ACF11472-20E4-4CF0-93CD-847ED9AEBCAE-300x169.jpeg)
Reja sahariane rastis edhe në një periudhë pandemie dhe krize klimatike prej ngrohjes globale çka e bën atë më të rrezikshme.
Një studim i fundit i Universitetit të Harvardit zbuloi se ndotja, pluhurat, rritin mundësitë e shtrimit në spital dhe normat e vdekshmërisë për shkak të kovidit-19.
Autoritetet kanë rekomanduar mbajtjen e maskave për të evituar thithjen e thërrmijave të dëmshme për shëndetin. Perg: DdVm