Vetëm pak ditë pasi Emiljano Shullazi u vendos në regjimin 41 Bis në burg, SPAK ka kërkuar sekuestrimin e një pjesë pasurie që ai ka, duke përfshirë edhe hotel “Vollgën”.
Policia dhe agjencia për pasuritë e sekuestruara, kanë rrethuar sot “Vollgën”, ku kanë vendosur shirita dhe letra që tregojnë se është pasuri e sekuestruar.
Burime zyrtare pohojnë se SPAK ka kërkuar sekuestrimin e pjesës së hotel “Vollgës” që është në pronësinë e Emiljano Shullazit. Kërkesa për sekuestro vjen në kuadër të Operacionit Forca e Ligjit, pasi Shullazi nuk e justifikon këtë pasuri, pavarësisht se ai ka deklaruar se i është dhuruar nga Ylvi Bejqja.
Prokurorët dyshojnë se Shullazi këtë pasuri e ka marrë nëpërmjet kërcënimeve, derisa Ylvi Beqja vendosi t’i dhuronte me kontratë një 30% të Hotel Vollgës. Shullazi arriti ta regjistronte në hipotekë pjesën e tij te hotel “Vollga”, e cila tashmë i është sekuestruar.
Historia e hotel “Vollgës” nis në vitin 1994 ku ka ndërruar disa herë pasuri dhe dyshohet se një pjesë e dokumenteve zyrtare janë falsifikuar. Godina ka ngelur në gjendje të rrënuar edhe pse ndodhet në një nga zonat më të preferuara në Durrës, pikërisht për shkak të problemeve të pronësisë.
Burimi: Tv klan
