Ministri i Mbrojtjes, Niko Peleshi pas mbledhjes së qeverisë, ka detajuar një projektvendim të menduar si ndihmë ndaj pushtetit vendor në përballjen e emergjencave civile.
“Projektvendimi parashikon një fond rreth 2 milionë dollarë, pjesë e paketës 20 milionë dollarë për emergjencat civile në të gjithë vendin.”-ka thënë Peleshi.
Ministri detajoi fondin total, i cili ndahet në tri pjesë. Pjesa e parë më 10 milionë dollar për projekte nga bashkitë, pjesa e dytë me vlerë 8 milionë dollar për transfer në buxhetin e bashkive dhe fondi i tretë po detajohet dhe mundëson që ministria të alokojë kur fondet e bashkive nuk mundësojnë ndërhyrje.
“Ky fond ndahet në një pjesë prej 10 milionë dollarë që janë shpallur për kërkesa mbi projekte nga bashkitë. Pjesa e dytë, me vlerë 8 milionë dollarë është transfertë direkte në buxhetin e bashkive, e kushtëzuar për investime në emergjencat civile dhe dëmshpërblime dhe fondi i tretë për të cilin po flasim, po detajohet dhe mundëson që ministria të alokojë brenda 2 ditëve sa herë evidenton një problematike emergjente, aty kur fondet e bashkive nuk mundësojnë ndërhyrje”, tha ministri Peleshi.
Ministri i Mbrojtjes shtoi se fondet për emergjencat civile do të shtohen në vijim, edhe falë financimit të qeverisë italiane.
“Këtë vit do të jetësohet financimi nga qeveria italiane prej 30 milionë euro, që do të mbështesë të gjithë sistemin, nga ai qendror dhe vendor, për menaxhimin e emergjencave civile”, ishin fjalët e tij.
