Deputeti i Partisë Demokratike, Ervin Salianji ndodhet në Shtetet e Bashkuara të Amerikës në kuadër të një vizite së bashku me disa deputetë të tjerë të Kuvendit të Shqipërisë.
Përmes një videomesazhi nga Qendra Qeveritare e Kongreseve, Salianji shprehet se për Shqipërinë është jetike lufta kundër korrupsionit.
Sipas tij, korrupsioni është plaga më e madhe që e ka mbërthyer vendin prej 10 vitesh.
Megjithatë, reagimi i Salianjit duket edhe si “kunj” për kreun e Rithemelimit, Sali Berisha i cili po hetohet nga SPAK për korrupsion pasiv. Prokuroria e Posaçme ka dërguar kërkesën në Kuvend për heqjen e imunitetit me qëllim caktimin e masës “arrest në shtëpi” ndaj Berishës, pasi injoiroi urdhrin e GJKKO për detyrim paraqitje.
“Në Atlanta të Shteteve të Bashkuara të Amerikës. Është e domosdoshme që çdo vend të ketë kontroll dhe balancë të pushteteve, të ketë pushtet gjyqësor të pavarur, të ketë institucione të cilat balancohen dhe kontrollojnë njëra-tjetrën për të bërë të mundur që korrupsioni të luftohet pavarësisht nivelit, pavarësisht personave dhe pavarësisht fuqisë së atyre që e ushtrojnë. Ky është mesazhi kryesor që po jepet në Qendrën Qeveritare të Kongreseve”, shprehet Salianji në videon e publikuar në llogarinë e tij të Facebook.
