Foshnja 9 muajshe gëlltiti kokrrën e fasules por e shpëtojnë mjekët shqiptarë, nëna serbe mesazh mirënjohje: Nuk kam fjalë ta përshkruaj.
Një foshnje 9 muajshe me përkatësi etnike serbe i është nënshtruar një ndërhyrje kirurgjikale, pasi kishte gëlltitur një kokërr fasule.
Mjekët e ORL-së në Qendrën Klinike Universitare të Kosovës, i kanë shpëtuar jetën foshnjës, duke ia larguar një kokërr të fasules nga bronku kryesor i mushkërisë së djathtë.
Pasi mjekët i kanë shpëtuar jetën fëmijës së saj, nëna e fëmijës, Milica Stojkoviq ka falënderuar mjekët. “Jashtëzakonisht jemi të kënaqur me mënyrën se si është trajtuar foshnja jonë. Nuk kam fjalë ta përshkruaj. Këtu njerëzit nuk dallohen në bazë të nacionalitetit. Çdo serb që ka probleme shëndetësore, mund të vijë këtu pa asnjë problem”, tha ajo.
“Ndërhyrja ka zgjatur rreth 40 minuta dhe trupi i huaj është larguar me procedurën e quajtur bronkoskopi. Foshnja e gjinisë mashkull nga komuniteti serb, me vendbanim në Komunën e Kamenicës, ishte dërguar, fillimisht, në Spitalin e Gjilanit. Pas problemeve të theksueshme me frymëmarrje, mjekët e kanë intubuar pacientin dhe me urgjencë e kanë nisur në Prishtinë”, thuhet në njoftimin e QKUK-së.
