Pas vendimit të GJKKO-së për rikthimin e çështjes së tij për rigjykim, Saimir Tahiri ka ndaluar që të japë edhe një deklaratë të shkurtër për mediat.
I pyetur për luftën kundër kultivimit të drogës, Tahiri iu përgjigj edhe kryeministrit Edi Rama, i cili disa ditë më parë nga foltorja e Kuvendit, tha se zbardhja e ngjarjeve përgjatë 3-4 viteve të fundit është rekord, duke zbehur kështu punën e mëparshme të ish-ministrit. Tahiri përsëriti frazën “ministër kampion” dhe theksoi se ka luftuar kanabisin më shumë se të gjithë ministrat e marrë bashkë.
Edhe pse gazetarët këmbëngulën që Tahiri të fliste me emra dhe t’u shpjegonte se kush mendonte që po i pengonte procesin, ish-ministri u tregua i rezervuar duke shtuar se do të vijë kohë që edhe ai do të flasë politikisht.
