Greqia ka zbuluar masat e reja për të gjithë ata persona që dëshirojnë të udhëtojnë drejt këtij vendi për pushime apo arsye të tjera. Pasagjerët që mbërrijnë në këtë shtet të Bashkimit Europian me avion, mjet lundrues apo nga pikat kufitare tokësore, do të duhet të plotësojnë një formular të veçantë të paktën 48 orë përpara udhëtimit.
Në bazë të tij do të marrin dhe një barkod special. Formulari mund të plotësohet në uebsajtin zyrtar “travel.gov.gr” dhe në të jepen informacione të detajuara si nga vini, arsyeja dhe kohëzgjatja e vizitës, numër telefoni etj.
Kjo masë e re është vendosur nga qeveria greke për të frenuar përhapjen e koronavirusit, pasi me 1 korrik do të rihapen të gjitha aeroportet e vendit.
Ndërkohë, në varësi të barkodit të marrë, autoritetet greke vendosin dhe lidhur me nevojën e një testi për Covid-19. Nëse një i tillë ju bëhet, duhet të prisni në një hotel deri në rezultatin e tij.
