Viktor DODA (11.10.1955 -)
Inxhinier gjeolog, drejtues, studiues, Doktor i Shkencave, Deputet, Ministër.
Ka mbaruar shkollën fillore e 8-vjeçare në vendlindje (Rubik); po në këtë qytet ka mbaruar shkollën e mesme gjeologjike (1970-74); mbaron në UT Fakultetin Gjeologji-Miniera, diplomuar: inxhinier gjeolog (1974-79). Ka përfunduar studimet pasuniversitare për Gjeoshkencat në Fakultetin e Gjeologjisë dhe Minierave të USHT (1998-2002). Ka marrë gradën shkencore “Doktor i shkencave”, në fushën e gjeologjisë (2003).
Ka punuar si inxhinier gjeolog në Gurth-Spaç (1979-80); Perlat (1980-84); drejtor i Ndërmarrjes Gjeologjike Rubik (1984-87). Në organet drejtuese të Pushtetit Lokal të rrethit Mirditë: shef seksioni, sekretar, zv.kryetar dhe kryetar i Komitetit Ekzekutiv i Rrethit (1987-92); inxhinier gjeolog në Ndërmarrjen Gjeologjike në Rubik (1992-97); Deputet i Kuvendit të Shqipërisë (1987-92); zvëvendësministër në Ministrinë e Ekonomisë Publike dhe të Privatizimit (1997-2001); ministër i Transporteve (prill-shtator 2001); Deputet i Kuvendit të Shqipërisë (2001-2005); ministër i Industrisë dhe Energjitikës (2002-2005); punësuar në sektorin privat (2005-2009); punonjës shkencor në Institutin e Gjeoshkencave të UPT (Tiranë) (2009-2013); Drejtor i Përgjithshëm i Shërbimit Gjeologjik Shqiptar (2013 e vazhdim).
Është autor i projekteve të punimeve të kërkim-zbulimit të v.b. të bakrit në Perlat-Mirditë (1980-85); autor i projektit të kërkim-vlerësimit për bakër në Kurbnesh (1981-82); autor i raportit mbi “Rezultatet e punimeve gjeologo-zbuluese për v.b. Perlat dhe llogaritja e rezervave” (1983); autor i studimit mbi perspektivën e mëtejshme të kërkim-zbulimit të mineralizimit sulfur të bakrit në zonën Prosek-Përlat-Shebe (1986); autor i projektit për vlerësimin gjeologo-industrial të shkëmbinjve karbonatikë në krahinën e Mirditës (1993); ..
V.Doda ka bërë dhe disa trajtime me bashkautorë si: Projekti i punimeve të kërkim-vlerësimit për parashikimin bakërmbajtës në zonën e Lëkundës (1981); në projektin e punimeve të kërkim-vlerësimit për parashikimin e bakërmbajtjes në viset e Prosekut (1982); Projekti i punimeve të prognozës së bakrit në rrethin e Mirditës (1983); Projekti i kërkim-vlerësimit të mineralizimit në sulfur të bakrit në hapësirën Përlat-Tarazh (1984); Raporti: “Përgjithësimi dhe kriterizimi në v.b. jometalore të Shqipërisë” (1995).
Si inxhinier gjeolog, si studiues në fushë të specialitetit të tij, ka marrë pjesë në disa konferenca kombëtare e ndërkombëtare, në Shqipëri e në shtete të tjera; ka mbajtur kumtesa a referate shkencore me tema nga gjeologjia në Shqipëri.
Për veprimtarinë e tij me dije e përkushtim, ka marrë shumë vlerësime, dekorata e tituj nderi. Ndër to ka marrë dekoratën “Çmimi i Republikës i shkallës së dytë” (1984).