Policia i bllokon 400 mijë dollarë një biznesmeni..

Policia shqiptare shpalli hetime për pastrim parash dhe ushtrim pa licencë i veprimtarisë financiare ndaj biznesmenit Aleksandër Gavoçi, por pa shpjeguar se në çfarë mënyre është kryer pastrimi i parave dhe as se kush ishte aktiviteti kriminal në origjinë të parave të kapura në tentativë për t’u pastruar. BIRN nuk arriti të kontaktojë me të akuzuarin.
Një llogari bankare me vlerë 400 mijë dollarë u bllokua me masën e sekuestros preventive nga ana e policisë dhe prokurorisë ditën e Enjte ndërsa një biznesmen, i raportuar nga policia me inicialet A.G., po tentonte t’i transferonte këto para për në Australi te i vëllai.
Në njoftim thuhet se lidhur me këtë rast, në Prokurorinë e Tiranës është regjistruar procedim penal për veprat penale “pastrimi i produkteve të veprës penale ose të veprimtarisë kriminale” dhe “ushtrim pa licencë i veprimtarisë financiare”.
BIRN mësoi se personi në fjalë është Aleksandër Gavoçi, një biznesmen në fushën e ndërtimit me xhiro vjetore prej miliona eurosh. BIRN nuk arriti të kontaktojë Gavoçin për koment.
Policia nuk dha shpjegime se cila është vepra penale nga kanë rrjedhur paratë e sekuestruara nën dyshimin e pastrimit të parave.