Në fshatin Gllavë në Tepelenë dy persona janë infektuar me antraks. Bëhet fjalë për një person të moshës 30 vjeç dhe një tjetër të moshës 50 vjeç.
Shkak për infektimin mendohet se është bërë një lopë që këta persona kanë therrur para disa ditësh ndërsa për fat të keq mishin e kanë shitur në të gjithë fshatin.
Kjo rrit seriozitetin e ngjarjes ndërsa mjeku epidemiolog, Roland Karalli është nisur me urgjencë nga Gjirokastra drejt fshatit për të mos lejuar daljen e situatës jashtë kontrollit.
Antraks është një sëmundje infektive që prek kafshët dhe prej tyre kalon tek njeriu. Në kafshë zhvillohet në formë septicemike, kurse te njerëzit shfaqet më tepër në formë të lokalizuar të puçrrës së zezë (pustula maligna).
Në gjuhe popullore kjo sëmundje njihet si “plasja”.
Para viteve ‘50 në Shqipëri plasja ka qenë shumë e përhapur dhe shkaktonte dëme të mëdha në bagëti e raste të shpeshta në njerëz.
Një vaksinë sistematike e prodhuar në Institutin e Kërkimeve Veterinare në Shqipërinë e para viteve ‘90, solli thuajse zhdukjen e saj.
