Ditën e sotme policia gjermane ka bërë me dije se ka vënë nën pranga njeriun e armatosur të mbiquajtur “Rambo”, pas pesë ditë gjuetie për të në Pyllin e Zi.
Bëhet fjalë për 31-vjeçarin Yves Rausc, i cili ishte arratisur i vetëm në pyllin pranë qytezës së Oppenau, në jugperëndim të Gjermanisë, pasi kishte kërcënuar një grup oficerësh policie dhe u kishte marrë pistoletat.
Ndërkohë forcat speciale, qen nuhatjeje dhe helikopterë me zbulues termikë ndihmuan për gjetjen e tij.
Siç shkruajnë edhe mediat e huaja, një punonjës poste kishte dhënë informacione mbi vendndodhjen e 31-vjeçarit dhe se një person ishte plagosur gjatë operacionit. Ndërsa një ditë më parë nëna e të riut i lutej autoriteteve ta linin të qetë.
Ajo kishte deklaruar se nuk kishte pasur kontakte me të birin që prej kohës kur ishte arratisur. “Ata duhet t’i tërheqin forcat e tyre, pas një apo dy ditësh ai do të dalë vetë nga pylli.”-tha ajo.
Policia ka bërë me dije se ai ka jetuar prej kohësh në Oppenau dhe e njeh mirë zonën e pyllit.
Më tej e ëma e tij ka thënë se Rausch është një “njeri i pyllit”, dhe se është “arratisur te natyra për të qenë i lirë”.
