Partitë Popullore Europiane/ Shqipëria njëherazi zgjedhje vendore dhe parlamentare

Grupi më i madh në Parlamentin Europian, ai i Partive Popullore, doli me një deklaratë të fortë sa i përket situatës politike në Shqipëri.
Pas marrëveshjes për Reformën Zgjedhore, ata kërkojnë zgjedhje të njëkohshme parlamentare dhe lokale me kodin e ri.
Po ashtu në deklaratën e mbajtur nga eurodeputeti Michael Gahler, kërkohet që zgjedhjet të jenë të lira dhe të ndershme.
DEKLARATA
Grupi i Partisë Popullore Europiane vazhdon të përkrahë Shqipërinë në udhën e saj drejt Bashkimit Europian. Prandaj ne e vlerësojmë marrëveshjen mes qeverisë e opozitës për një pjesë të rëndësishme të reformës së Kodit Zgjedhor në përputhje me standartet e BE dhe OSBE.
Kjo reformë duhet të përfundojë me këtë frymë dhe, mbi të gjitha, duhet të zbatohet në mirëbesim në zgjedhjet e ardhshme parlamentare dhe lokale. Ato zgjedhje duhet të jenë të lira e të ndershme. Kjo është thelbësore për demokracinë në Shqipëri, por, gjithashtu, plotëson dy kushte të BE për fillimin e negociatave të antarësimit.
Ne u bëjmë thirrje autoriteteve të punojnë për përmbushjen e 15 kushteve që duhet të përmbushë Shqipëria në menyrë që të çelen negociatat. Ne insistojmë për anullimin e legjislacionit që rrezikon lirinë e shprehjes, si dhe për procedimin penal kundër atyre që kanë blerë vota në zgjedhjet e shkuara.
*Deklaratë e grupit PPE në Parlamentin Europian, koordinator i grupit për çështjet e zgjerimit Michael Gahler (CDU) Perg: VM DD