Ministria e Brendshme dhe Policia e Shtetit hapin konkursin e pikturave të nxënësve, mbi dhunën në familje dhe dhunën seksuale.
Si një nga format e parandalimit të kriminalitetit, Ministria e Brendshme dhe Policia e Shtetit, kanë vijuar me gjetje, mënyra e perceptime, për të denoncuar në kohë dhunën në familje dhe dhunën seksuale tek të rinjtë.
Bazuar në strategjinë e Policimit në Komunitet, mbi forcimin e vlerave të organizatës, duke e përshtatur atë me nevojat e komunitetit e duke aplikuar policimin proaktiv, po bashkëpunohet në çdo kohë me organet e qeverisjes vendore, arsimin, OJF, si dhe shërbime publike e subjekte të ndryshme të shoqërisë, me qëllin garantimin e të drejtave e lirive themore dhe sigurinë publike si një prioritet absolut.
Të gjithë së bashku, përmirësojmë punën në drejtim të mbrojtjes së fëmijëve, duke shtrënguar më tej masat dhe koordinimin në kohë të të gjithë zinxhirit referues të mekanizmit të mbrojtjes.
Nxënës të disa shkollave të zonës së Kamzës, Bathores, Paskuqanit, Vorës, Kombinatit e Pezës kanë realizuar piktura për dhunën me bazë gjinore, në kohë pandemie. Ata kanë shprehur përmes artit perceptimet ndaj çdo forme dhune dhe abuzimi.
Ministria e Brendshme dhe Policia e Shtetit, po koordinojnë të gjithë procesin në interesin më të lartë të fëmijës, gjithashtu ngrejnë zërin për të raportuar dhe kallëzuar duke ftuar çdo vajzë, grua, nënë, prind, profesionistë, të cilëve iu është kërcënuar apo kanë marrë dijeni për abuzime, dhunë, neglizhim të çdo lloj forme shfrytëzimi apo trafikimi, të telefonojnë Policinë e Shtetit 112 apo Komisariatin Digital, duke ruajtuar në çdo rast anonimatin.
Në rrjetet sociale po publikohen punimet e nxënësve dhe përmes votimit të hapur deri në 1 Korrik 2020, me votat e publikut do të zgjidhet punimi më i bukur.
