ONM, BE, SHBA dhe Ministria e Drejtësisë bëhen bashkë për reformën në drejtësi, Gjonaj: Plan konkret për të ecur përpara, analizë të thelluar për arritjet, problematikat dhe sfidat
Reforma në drejtësi ka bërë sërish bashkë përfaqësuesit e Operacionit Ndërkombëtar të Monitorimit, Shteteve të Bashkuara, Bashkimit Europian, Komisionit Europian, misioneve EURALIUS e OPDAT si dhe Ministrisë së Drejtësisë.
Ministrja Etilda Gjonaj përmes një postimi në rrjetet sociale ka përcjellë disa nga detajet kyçe të takimit të zhvilluar online, ku nënvizon se është kryer një analizë e thelluar mbi arritjet e deritanishme, problematikat dhe sfidat e reformës në drejtësi.
Gjonaj, sjell në vëmendje edhe një plan konkret për të ecur përpara me rezultatet e pritshme.
Ndër të tjera ministrja e Drejtësisë shkruan:
“Pata kënaqësinë të zhvilloj një takim online shumë të frytshëm me Drejtoreshën për Ballkanin Perëndimor dhe shefen e Operacionit Ndërkombëtar të Monitorimit (ONM) Znj. Genoveva Ruiz Calavera, ambasadoren amerikane Znj Yuri Kim, ambasadorin e BE-së Z. Luigi Soreca, ekipin e Komisionit Evropian, dhe me përfaqësueset e misioneve EURALIUS dhe OPDAT në Shqipëri. Në këtë takim të rëndësishëm ndamë me partnerët tanë të ngushtë konkluzionet e analizës së detajuar mbi arritjet dhe problematikat e zbatimit të Reformës në Drejtësi, dhe një plan konkret veprimi për të ecur përpara me rezultatet e pritshme për Reformën në Drejtësi. Në kuadër të mbështetjes teknike dhe buxhetore të Komisionit Evropian për zbatimin e reformës, diskutuam bashkërisht mbi mënyrën më të mirë për të rritur eficencën e saj. Dua të shpreh mirënjohjen për mbështetjen e pandërprerë të Komisionin Evropian 🇪🇺, dhe bashkëpunimin e çmuar me delegacionin e BE-së në Shqipëri dhe ambasadën e Shteteve të Bashkuara 🇺🇸, në këtë moment kaq të rëndësishëm të historisë së drejtësisë shqiptare.”, nënvizon Gjonaj.
