Nuk justifikon PASURINË, gjyqtari i Apelit të Tiranës ‘digjet’ në Vetting
Gjyqtari i Apelit të Tiranës, Artur Gaxha është shkarkuar nga detyra nga KPK.
Ai u përball me një seri problemesh të pasurisë dhe mungesë burimesh në vlera të mëdha gjatë seancës dëgjimore me Komisionin e Pavarur të Kualifikimit të premten.
Artur Gaxha e ka filluar karrierën në sistemin e drejtësisë në vitin 1995. Ai ka punuar për më shumë se një dekadë në Gjykatën e Tiranës, ndërsa në vitin 2016 u emërua gjyqtar i Gjykatës së Apelit Tiranë. Inspektoriati i Lartë i Deklarimit të Pasurive nuk kishte konstatuar probleme në pasurinë e Gaxhës, por KPK e përmbysi atë në seancë. Sipas relatores Qirko, gjyqtari rezultonte me pamundësi financiare në dhjetëra milionë lekë për krijimin e pasurive të tij si dhe mosdeklarim të pasurive dhe huave.
Gaxha i kundërshtoi gjetjet dhe e konsideroi hetimin të paragjykuar. Trupa gjykuese që kreu procesin e vettingut u përbë nga Firdes Shuli kryesuese, Pamela Qirko relatore dhe Roland Ilia anëtar.
Në fjalën e tij ai e cilësoi raportin e KPK me gabime të rënda dhe të pabazuar në prova. “E konsideroj si paaftësi, për të mos e vlerësuar dashakeqësi. Një guxim të tepruar për tejkalimin e ligjit nga Komisioni”, deklaroi gjyqtari Artur Gaxha.
