Nga Vladimir Muçaj: Kush i fiton zgjedhjet e 25 Prillit, Rama apo Basha me aleatët?
Fushata zgjedhore ka kohë që ka nisur nga partitë politike. Madje ka nisur e ashpër dhe duke shkelur rregullat dhe kohën e përcaktuar me ligj! Gjithsesi për shkak të mungesës së vullnetit të institucioneve ligjzbatuese dhe etheve të forta për pushtet të krerëve partiak kjo fillim fushate para afateve nuk u ndal aspak! Përtej këtij fakti të padiskutueshëm kjo fushatë u fut në korniza të reja zhvillimi për shkak të pandemisë. Dhe në këtë pikë ka vend për koment e diskutim. Të gjitha partitë politike cila më shumë dhe më pak i kanë thyer rregullat anti-covid. Kjo fushatë si asnjëherë tjetër e imponuar nga situata covid po zhvillohet pak në terren dhe më shumë në rrjetet sociale online. PS, PD, LSI kanë gjetur lloj- lloj formash komunikimi në këto rrjete, por duke zbritur dhe në bazën e votuesëve. Partitë duket se kopjojnë njëra-tjetrën. Rëndshëm përtej takimeve masive po praktikohet kërkesa e votës derë më derë. Në fund të fundit është gjë e mirë që përdoret kjo taktikë e drejtëpërdrejtë elektorale. Por lind dhe pyetja e madhe: Kush i fiton këto zgjedhje?! Rama? Basha-Kryemadhi? Në bazë qarkullojnë me dhjetra opinione dhe parashikime. Si gazetar kam ndjekur shumë fushata zgjedhore ashtu sikundër dhe këtë që ka ditë e cila ka nisur. Nuk dua të rreshtoj këtu opinionet e shumta që kanë njerëzit sepse do të ishte e pamindur. Nisur nga qindra kontakte dhe biseda të këtyre ditëve po jap nje opinionin tim por për të qenë i hapur, opinioni im është nje mesatare e nxjerrë nga këto biseda dhe komunikime të mia në terren me qytetarë të të ‘ngjyrave’ të ndryshme politike. Personalisht nuk më plas fare për asnjë forcë politike! Unë mundohem të jem mirë në llogoren time, në atë të medias. Si njeri i medias ndër dekada pa dashur të bëj profetin mendoj se këto zgjedhje me gjithë mëkatet e qeverisjeve të Edi Ramës ato i fiton Edi Rama, i fiton Partia Socisliste! I fiton ajo sepse sipas meje Opozita me kapilarët e saj janë të konsumuar dhe të provuar si të paaftë dhe të korruptuar në vitet e weverisjes se tyre! Opozita nuk mund të fitoj thjesht dhe vetëm nga konsumimi i Edi Ramës ndër këto vite në qeverisje! Mund të ketë dhe ka shumë të pakënaqur dhe ndër radhët e socialistëve! Por të pakënaqurit nuk besoj se janë votë për opozitën. Rama si lojtar politik i rrafinuar do luaj fort e më bukur se Basha deri në minutën e fundit për më shumë vota dhe prej të pakënaqurve! Në planin taktik opozita po i luan mirë gurët e “shahut” për maksimizimin e votës! E kam fjalën për daljen e LSI-së e vetme në “betejë” e cila e mundëson këtë! Kaq nuk mjafton! Dhe megjithatë mendoj se Edi Rama, Partia Socialiste do të jetë forca e parë politike qe do siguroj shumicën, rrjedhimisht dhe qeverinë e re!.Unë do ja dëshiroja mandatin e të tretë Edi Ramës për investimet në të gjitha qendrat urbane! Nuk do ja dëshiroja mandatin e tretë Edi Ramës për korrupsionin e lartë dhe monopolizimin e ekonomisë në pak duar njerëzish të këtij vendi! Nuk do ja dëshiroja mandatin e tretë për dallkaukët në radhët e administratës ! Nuk do ja dëshiroja gjithashtu dhe për qëndrimin e tij agresiv ndaj medias duke e cilësuar “KAZAN”! Përtej parashikimit tim duke ‘shtrydhur’ dhe qindra opinione në bazë, një mandat i tretë i Edi Ramës do ishte i frikshëm! Dhe nëse ai e siguron një të tretë mandat padyshim që mëkatare e paaftë jo vizionare do përfundonte dhe e gjithë opozia e tanishme! Le të presim!
