Nga Stelina DUSHI
Abuzimet seksuale dhe dënimet e parashikuara në legjislacionin shqiptar
Shoqëria jonë po haset gjithmonë e më shumë me fenomenin e quajtur abuzim seksual. Nga vetë fjala abuzim, ky krim seksual kryhet me dhunë fizike apo psikologjike, qoftë me kërcënime për jetën e saj/tij, të familjarëve të tyre apo për shumë arsye të tjera, këta individë pranojnë t’i nënshtrohen kërcënimit. Zakonisht për shkak të frikës së mentalitetit të rrënjosur në shoqërinë tonë, për shkak të opinionit publik u duket sikur kanë një “njollë” nëse tregojnë rastet e tyre. Madje këta individë quhen shpeshherë edhe fajtorë, apo ndjejnë turp dhe kjo për shkak edhe të gjendjes së rënduar psikologjike që kanë.
Ku mund të gjejnë ndihmën e parë këta persona? Logjikisht do thoja të shpreheshin te prindërit e tyre dhe ta denoncojnë si rast në media, televizione dhe të ngrenë zërin për veten dhe për ata të tjerë që kanë heshtur dhe kanë pranuar të bëhen viktima, pa harruar denoncimin në polici.
Po në të vërtetë a funksionon kështu? Prindërit, shpesh në zonat rurale, janë bërë viktima me kohë të mentalitetit dhe opinionit të fisit apo të fshatit e kujtdo tjetër, për këtë arsye shumë adoloshentë nuk gjejnë mbështetjen dhe sigurinë te familja, duke menduar se do të mohohen. Me të drejtë, sepse që në fëmijëri janë rritur me këtë frymë. Si njohëse e mirëfilltë e ligjit që jam, si fillim hyj tek ajo pjesë e shoqërisë që e refuzon dhe e kundërshton këtë gjë, duke dashur që të denoncohet çdo rast krimi seksual, sepse nuk mund të presim derisa ky fenomen të mos ketë më as kontrollin minimal.
Shoqëria jonë është fajtore për pjesën më të madhe, sepse shpesh kur jemi hasur me lajme të tilla, kam dëgjuar edhe komente tipike të tipit: “Ajo e ka pasur fajin vet, me siguri e ka bërë me vullnetin e saj të plotë”. Kjo shoqëri ka tendencën të gjykojë në vend që t’i vijë në ndihmë këtyre individëve, duke harruar që edhe ne vetë mund të bëhemi pre e këtyre krimeve seksuale, duke marrë parasysh dhe shkallën e gjerë të përhapjes që ka bërë ky fenomen. Pra, pse mos të bashkëpunojmë në ndëshkimin dhe parandalimin e saj?
Ç’të bëni?
Ju mund të shkoni në polici dhe të paraqisni një ankesë. Ata janë të detyruar ta respektojnë privatësinë tuaj. Nëse shkoni në polici brenda 72 orëve, mund t’ju bëjnë një ekzaminim mjekësor për të gjetur prova për autorin e krimit. Ekzaminimi zgjat 1,5 deri në 2 orë. Policia i dërgon mostrat në një laborator për ekzaminim.
Ky ekzaminim mund të bëhet dhe në “Qendrën për Kujdesin ndaj Dhunës Seksuale”. Ju mund të shkoni atje edhe për ndihmë mjekësore e psikologjike, si dhe për të regjistruar një ankesë, edhe nëse kanë kaluar 72 orët nga ndodhia.
Çfarë parashikon legjilslacioni ynë penal lidhur me krimet seksuale?
Marrëdhënie seksuale ose homoseksuale me të mitur, e cila dënohet me burgim nga shtatë deri në pesëmbëdhjetë vjet; Marrëdhënie seksuale ose homoseksuale me dhunë me të mitur të moshës 14-18 vjeç dënohet me burgim nga pesë deri në pesëmbëdhjetë vjet. Kur marrëdhënia seksuale ose homoseksuale, me dhunë, kryhet në bashkëpunim ose më shumë se një herë, ose kur fëmijës së dëmtuar i shkaktohen pasoja të rënda për shëndetin, dënohet me burgim nga dhjetë deri në njëzet vjet.
Kur vepra ka sjellë si pasojë vdekjen ose vetëvrasjen e fëmijës së mitur dënohet me burgim jo më pak se njëzet vjet; Marrëdhënie seksuale me dhunë me të rritura tre deri në dhjetë vjet. Kur marrëdhënia seksuale me dhunë kryhet në bashkëpunim ose më shumë se një herë, ose kur të dëmtuarës i shkaktohen pasoja të rënda për shëndetin, dënohet me burgim nga pesë deri në pesëmbëdhjetë vjet.
Kur vepra ka sjellë si pasojë vdekjen ose vetëvrasjen e të dëmtuarës, dënohet me burgim nga dhjetë deri në njëzet vjet; Marrëdhëniet homoseksuale me dhunë me të rritur tre deri në shtatë vjet; Marrëdhënie seksuale ose homoseksuale me persona të pazotë për t’u mbrojtur dënohet me burgim nga pesë deri në dhjetë vjet; Marrëdhënie seksuale ose homoseksuale me kërcënim me përdorimin e armës dënohet me burgim nga pesë deri në pesëmbëdhjetë vjet; Marrëdhënie seksuale ose homoseksuale duke shpërdoruar detyrën dënohet me burgim deri në tre vjet; Marrëdhënie seksuale ose homoseksuale me persona në gjini ose nën kujdestari dënohet me burgim deri në shtatë vjet; Marrëdhënie seksuale ose homoseksuale në vende publike dënohet me gjobë ose me burgim deri në një vit; Dhuna seksuale -Ushtrimi i dhunës seksuale, nëpërmjet kryerjes së veprimeve me natyrë seksuale në trupin e një personi tjetër me objekte, përbën vepër penale dhe dënohet me burgim nga tre deri në shtatë vjet.
Kur kjo vepër kryhet në bashkëpunim, kundër disa personave, më shumë se një herë, ose kundër fëmijëve të moshës katërmbëdhjetë deri në tetëmbëdhjetë vjeç dënohet me burgim nga pesë deri në pesëmbëdhjetë vjet.
Kur kjo vepër kryhet ndaj një të mituri që nuk ka arritur moshën katërmbëdhjetë vjeç apo një të mituri që nuk ka arritur pjekurinë seksuale, pavarësisht nëse kryhet me dhunë apo jo, dënohet me burgim jo më pak se njëzet vjet. Kur kjo vepër ka sjellë si pasojë vdekjen ose vetëvrasjen e të dëmtuarit dënohet me burgim jo më pak se njëzet e pesë vjet; Vepra të turpshme dënohen me burgim nga tre deri në shtatë vjet.
Vetëm ne mund ta ndihmojmë njëri-tjetrin, ne si shoqëri duhet të bëjmë të pamundurën duke i mbështetur dhe duke u ofruar ndihmë me sa të kemi mundësi dhe jo duke i gjykuar apo larguar si të kishin ndonjë virus. Në fakt, unë do ta quaja një virus këtë fenomen që po shkakton dëme aq të renda në psiqikën e viktimës së abuzuar e në trupin e tij/saj dhe që po përhapet shumë shpejt, kjo për shkak të heshtjes sonë, prandaj duke njohur të drejtat tona, nuk duhet të dorëzohemi.
Të gjithë së bashku ta çrrënjosim këtë mentalitet, duke i bërë vajzat tona të ndihen të lira të flasin rreth problemeve që kanë dhe duke i parandaluar ato t’u nënshtrohen këtyre veprave penale, sepse nuk gjejnë rrugëdalje apo mbështetje as te familja e tyre. Le të bëjmë diçka, le ta nisim ndryshimin nga vetja jonë. Nëse nuk mund t’i ndihmoni, shmangni paragjykimet dhe kritikat, sepse të nesërmen ky fenomen mund të na prekë ne apo vajzat tona. Kështu që le të bëhemi të gjithë së bashku dhe të ngremë zërin për të drejtat tona, le të jemi më të bashkuar se kurrë, për një shoqëri më të sigurt!
