MREKULLITË E SHEMES…
Dija që në Bënçë ka “folenë” historia e lirisë dhe historia e këngës.
Tani që i pashë nga afër punimet e Sheme Meçes më duhet ti shtoj edhe një aset tjetër kësaj “folesë” bënçore.
Atë të mjeshtërisë, të një mjeshtërërie bio, e gjitha fryt i mëndjes dhe duarve të Shemes, këtij njeriu që, siç thonë, ç’i sheh syri, ja bën dora.
Jo me laps e letër, as me dru e gjë tjetër, vetëm me gurë, me guraleca, me shtufe, me stralle e zeje lumi.
Nga lumi i Bënçës që shkon përfund Bujtinës që Shemia ka ngritur buzë rruge.
Rrugës që kalon përmes fshatit e që ngjitet në Kurvelesh, për të zbritur pastaj në Kuç, tani pikë nyje e lidhjes së detit me malin, përmes rrugës së re të hapur e asfaltuar këto ditë.
Befasues ky mjedis që Shemia ka krijuar këtu në këtë grykë malesh, një atraksion gati i pa besueshëm i realizuar nga një njeri i vetëm, madje edhe më e pa besueshme kur mëson se ka dy a tri vite që i ka kaluar tetë dekada jete.
Gjithfarë imitacionesh shpendësh e kafshësh pylli i ka derdhur në artin e tij, siç ka jetësuar aq bukur jetën në mjediset pastorale të staneve e barinjve me nam të këtyre anëve.
Ç’ka bërë ky njeri duar artë e punë mirë në këto rrëpira e harca.
Pëllëmbë e vepra aristike, hap e gjelbërim të hatashëm, me pemë të lloj-llojshme e tenda hardhish hie plota.
Koha e pandemisë ja ka pamundësuar hapjen por në këmbë i gjetëm së bashku me bashkëshorten e jetës, në selitje të punëve.
Në katin e dytë disa nga dhomat presin e përcjellin mysafirë nga bota.
Shemja, si në një ditar kujtimesh, i ka mbajtur shënim të gjithë dhe deri tani i kanë kaluar njëqind…
Këtu një gotë raki vëndi e nxjerrë nga Shemja me merak të duķet si më e mira pije e botës.
Si e famshmja verë e Bordosë.
Lart malet e larta me kanionet famëmadhe të Nivicës e Progonatit, poshtë, nga hyrja në Grykë, ujësjellësi monumental i Pasha Aliut.
Tani në Bënçë të presin të tria; lavdia partizane e luftës së dytë botërore e Abaz Shehut me shokë, kënga kryevepër e bënçorëve dhe…Bujtina plot vepra të gurta e duar artit, Sheme Meçe.
Bënçë; 22.05.2021