IKËN NJË NGA MË TË MËNÇURIT E SHQIPËRISË, MOIKOM ZEQO.
Mbylli sytë përgjithmon një nga më të mënçurit e shqiptarëve të sotëm. Më trishtoi pa masë kjo ikje e pamerituar e intelekualit të shquar MOIKOM ZEQO.
Ky personalitet me përmasa e kontribute të jashtëzakonshme në mbarë Botën Shqiptare, ishte nga më të mënçurit dhe më produktivët në disa fusha e lëmi, si ato të albanologjisë, arkeologjisë, historisë, letërsisë, muzeologjisë, arteve figurative, etj. Në këto fusha ai dha një kontribut të jashtëzakonshmëm me më shumë se 100 libra të botuar, në shqip dhe në gjuhë të huaja. Librat e Moikom Zeqos janë përkthyer në shumë gjuhë të botës, në anglisht, gjermanisht, frëngjisht, italisht, greqisht, sërbokroatisht, bullgarisht, rumanisht, polonisht, danisht, esperanto dhe gjuhë të tjera.
Gjatë jetës së tij 71 vjeçare, ai dha një kontribut të madh me studime të pakrahasueshme në fushat e sipërpërmendura. Ndonëse lindi më 3 qershor 1949 në qytetin e Durrësit, ai parapëlqente të prezantohej si një libohovit dhe gjirokastrit, njëkohësisht.
Ndihem krenar që e kam patur Mik dhe Mësonjës, këtë personalitet, të aftë, të dashur, të ditur, të palodhur, që modestia e bënte edhe më madhështor në ndjesinë time.
Mirënjohje për atë çka bëri për Shqipërinë. E kam adhuruar, aq sa kjo ikje më ngjan e pabesueshme dhe e pakuptimtë. Besoj se kishte ende për të thënë, kishte ende punë të pakryera. Ende duhej të ishte, të jetonte…
Lamtumirë miku im i pazëvendësueshëm!
