Asgjë për t’u çuditur nga audiopërgjimet e publikuara sot ku një gazetar i televizionit Report Tv përshkruan se si funksionon gjobëvënia nga mediat në Shqipëri ndaj biznesmenëve e deri tek figurat më të larta të shtetit.
Ky fenomen ka ekzistuar gjithmonë dhe nuk përbën ndonjë lajm. Gjobëvënia ecën vetëm aty ku ka abuzime dhe shkelje ligji, e mesa duket Shqipëria vazhdon të krimbet çdo ditë nga skandalet, korrupsioni dhe abuzimet. Ajo që nuk mirëkuptoj aspak është fakti se si një media apo gazetar që duhet të informojnë dhe t’i përcjellin të vërtetën publikut, në vend që të funksionojnë si të tilla funksionojnë si gjobëvënsa. Domethënë këta fshehin pisllëqet, abuzimet dhe skandalet e biznesmenëve shqiptarë dhe politikanëve, si dhe kyçin gojën kundrejt pagesave mijëra euro.
Situata me mediat ashtu si çdo gjë tjetër në këtë vend është një katrahurë e vërtetë, dhe më e keqja askush nuk merr asnjë masë e nuk flet. Kur diskutohen paketa antishpifje në Parlament menjëherë opinioni publik del në mbrojtje të mediave dhe akuzon pushtetin se po cënon fjalën e lirë. Po tani? A është normale që një media të vendosë gjoba? A është normale që një media të heshtë dhe mos shfaqë të vërtetën në publik kundrejt pagesës? A është e drejtë që një shqiptar i ndershëm të punojë gjithë jetën dhe të mos ketë sot mundësinë të blerë një shtëpi të tijën kurse këta gjobëvënës të marrin vila pa asnjë ditë pune vetëm sepse kanë informacione përvëluese? Pse të gjobiturit nuk denoncojnë gjobëvënësit kur ka raste të tilla? E thjeshtë, sepse një denoncim i tillë i fundos të dyja palët, atë që gjobit dhe atë që ka abuzuar apo shkelur ligjin. Problemi më i madh me mediat në këtë vend është se abuzojnë me pushtetin që kanë.
Është fatkeqësi që ka media dhe gazetarë në Shqipëri që funksionojnë si vegla ose të pushtetit, ose të eprorëve ose të personave me funksione të caktuara. E nëse i kthehemi rastit të sotëm, kemi të bëjmë me një mëndjelehtësi dhe jo vetëm, të gazetarit që nxjerr veten zbuluar. Mëndjelehtësi kjo shumë e dobishme për popullin, për të kuptuar dhe mësuar se sa mirë e bëjnë detyrën mediat dhe se në këtë vend askush nuk mendon për shqiptarët, këta janë dhe do jenë gjithmonë të vetëm përsa kohë të kemi këto njolla të zeza përreth.
Turp për ato media që ndotin këtë profesion fisnik dhe nuk i shërbejnë të vërtetës.
