Kjo opozitë është realisht turpi dhe fatkeqësia më e madhe e këtij vendi. Bilbila, fyerje, bllokime foltoresh, ulërima. Një opozitë të marrësh që në vend të vendosë qeverinë para përgjegjësisë dhe të ofrojë alternativa konkrete për popullin, shkon në Kuvend me bilbil a thua se situata e keqe që ka mbërthyer vendin në të gjithë sektorët e jetës është thjesht një loje futbolli.
Miliona euro apo lek të vjedhura, taksa të keqpërdorura duke filluar nga Bashkitë e duke
vazhduar me shumë institucione të tjera në nivele më të larta. Skandale pafund të dala nga dhomat e pushtetit dhe opozita vazhdon avazin e vjetër, gam gam në Kuvend, jashtë atyre dyerve vazhdon të tallet qetësisht me hallet e popullit. Në një vend normal një opozitë serioze e jo kllounatë si kjo e jona do e kishte vendosur qeverinë me dhjetra herë përpara përgjegjësisë dhe përpara ligjit.
Përsa kohë të shohim estradë në parlament dhe këtë kategori politikanësh që na kanë mbirë në sy e veshë, vendi do vazhdojë të ngelet i mbërthyer nga keqqeverisja dhe varfëria. Shqipëria ka nevojë për forca të reja politike, për politikanë ndryshe, boll më me të njëjtët personazhe që nuk prodhojnë asgjë veçse e mbajnë vendin e mbërthyer dhe e çojnë prapa. Këtij vendi i nevojitet dëshpërimisht ndryshimi, sa nuk është vonë.