“Të flasësh me urtësinë e mendjes dhe gjuhët e shpirtit”
Nuk jetojmë në periudhën madhështore të filozofëve grekë,as në kohën e të papërsëritshmit Konfuc; s’jemi as të diplomuar në Filozofi,por ama vetë vorbullat misterioze të jetës na bëjnë pak filozofë.
Disa i thonë,të tjerë i përcjellin ,kurse shkrimtari nga Kosova Fadil Ismajli ka vendosur që nëpëemjet të shkruarit të flasë me mesazhe filozofike jetësore të përfshira në librin me titull befasues ” Një milion arsye”,(esse dhe fjalë të urta).
I veçantë në zhanrin e tij ,pasi tregu i stendave librare mbizotëron nga letërsia e mirfilltë dhe temat historiko-politike.
Autori ka sfiduar edhe faktorin ekonomik që vështirëson botimin për arsye të lexueshmërisë,dhe me vendosmëri ka dalë përtej këtyre kornizave sepse misioni i tij human për të ndihmuar të tjerët nëpërmjet kuptueshmërisë shkon paralelisht me faktin e “Njohjes së vetvetes”.
Thinjat jo gjithmonë janë shenjë pjekurie,ndaj “t’i japësh fjalë dhimbjes”-siç thotë edhe Shekspiri,nga ato fjalë të hijshme që ngushëllojnë,freskojnë,
inkurajojnë e frymëzojnë,që mund të hapin jo vetëm dyert por edhe zemrat,ndriçojnë si xixëllonja të vogla brenda librit.Kjo për faktin se vetë shkrimtari,përtej stilit letrar ka ruajtur në të shprehur origjinalitetin si qenie njerëzore ku si ai,të gjithë në këtë botë mund të ndodhemi herë pas herë në një labirinth të errët në të cilin rrezikojmë të ngatërrohemi e të humbasim.Me apo pa mbështetjen e shoqërisë,na duhet të përballemi me vendime të rëndësishme,të luftojmë brenda vetes mes ndjenjës dhe arsyes,trishtimit e luhatjeve emocionale, sfidës mes zhgënjimit e shkurajimit si dhe rrëzimit me vendosmëri të kështjellave prej frike që shkaktojnë ankthet.
Përjetimet psikologjike janë rrëfime dramatike të modelit frojdist modern.
Tek shkrimet nuk egziston Uni ose Egoja por Dashuria për ëndrrat,theksohet tipari i pasioneve të fshehura,dalja me imagjinatë përtej mureve të gurta të zakoneve e mentalitetit që e ndrydhin lirinë e shpirtit.Bie në sy dhe mirësia e mendimeve me anë të pyetjeve vetshqyrtuese për të kuptuar më praktikisht daljen nga gracka e zhgënjimit në lidhje me atë që pretendojmë nga vetja dhe të tjerët.
Për temat filozofike të shprehura në formë eseje dhe fjalësh të urta ,autori është motivuar nga ambjenti ku jeton,faktorët kulturorë,historikë e social ,dhe ka mësuar të shohë përtej këtyre ndryshimeve reale ose të imagjinuara,gjë që padyshim do ndihmojë shumë persona të gjendur në situata udhëkryqesh mendimesh të thella që të kuptojnë lehtësimin për atë që s’e shprehin dot me fjalë.
Me vetëdije të plotë dhe me përulësinë që e karakterizon ,autori i librit Fadil Ismajli pranon se “Mençuria më e madhe buron nga Zoti”,prandaj ato një milion arsye qofshin si një milion zgjidhje për enigmat jetësore të lexuesve;për ata që me pak mençuri praktike “jo thjesht janë gjallë,por që duan të ndihen gjallë”. ARJOLA KONDAKÇIU
