Ka shumë figura në analizën politike të përditshme të cilët proklamojnë që Sali Berisha dhe statusi i tij me Shba-të janë problemi më i madh apo dhe i vetëm i PD-së sot. Të tjerë i shtojnë kësaj analize idenë që Sali Berisha është shumë i konsumuar nga vitet e gjata në politikë dhe kjo reflekton negativisht në rezultatin e PD-së në zgjedhje.
Të dyja këto ide janë të gabuara ose më saktë prezantojnë vetëm gjysmën e të vërtetës. Në rradhë të parë, Berisha ka qenë që në 1992 një figurë polarizuese dhe kjo ka efekt të pashmangshëm në zgjedhje. Në rradhë të dytë sigurisht që të qenurit në pushtet për 13 vjet shkaktojnë konsum politik. Por, a mund të themi që ai është fillimi dhe fundi i problemit? Për mendimin tim, PD është e dominuar nga figura të cilët janë po aq të vjetër në politikë sa ai, dhe me mungesën e popullaritetit të tij me bazën e djathtë. Nëse Berisha do të hiqej dhe do të zëvendësohej nga ata(qofshin grupi që qendron pranë tij apo Basha), rezultati elektoral i PD do të ishte dhe më i dobët sesa 14 Maji. Kjo pasi përveç faktit që këto figura kanë një konsum të thellë në politikë, ata gjithashtu nuk posedojnë karizmën dhe prezencën e Berishës.
Lind pyetja: Ku është rinia? Ku janë personalitetet e reja që ka prodhuar kjo parti kaq popullore dhe me rrënjë të thella në demokracinë shqiptare? Ku është shpresa për ndryshim? Që PD të ngjallë besim në popull ajo nuk duhet të dominohet nga kolltukofagë të cilët më shumë sesa një forcjee të re e cila i bind shqiptarët të votojnë për të dhe të shporrin pushtetin, i ngjasojnë Edi Ramës me dëshirën e tij për të bërë gjithçka, për të eliminuar të gjithë miqtë dhe bashkëpunëtorët vetëm kolltukun të ketë. PD ka nevojë të hapet ndaj ndryshimit dhe forcave të reja. PD ka nevojë të hapet dhe të sjellë një klasë të re lidershipi politik të djathtë e cila mund të prezantohet si një ndryshim real. Është shumë e thjeshtë të vendosësh fajin te Berisha dhe ti transferosh atij çdo problem, por e vërteta është që ai është vetëm maja e ajsbergut dhe PD duhet të hapet dhe të ringrihet. Duhet bërë ajo çka Foltorja pretendoi të bënte. Duhet hapur PD-ja dhe të ngrihet një parti e re përmbi rrënojat e të vjetrës e cila ende pretendon se të gjithë e kanë gabim dhe ajo ka të drejtë. Populli ka të drejtë gjithmonë, dhe populli po voton me këmbët e veta duke ikur larg pasi nuk shohin asnjë shpresë tek askush. Dhe për mua është kriminale që PD nuk inspiron këtë shpresë. Duhet jo vetëm të themi por gjithashtu dhe të bindim, dhe kjo nuk bëhet me figura të cilat e kanë provuar prej dekadash se çfarë vlerash kanë apo nuk kanë.
