Mjekja e spitalit Infektiv apel të fortë: Ja kush është arma e vetme kundër Covid.
Mjekja e Shërbimit Onkologjik në QSUT, Dhurata Tarifa i është drejtuar me një apel të fortë të gjithë qytetarëve që të respektojnë masat kundër Covid.
Tarifa u drejtohet qytetarëve duke u thënë që të mbajnë maska, të ruajnë distancimin social dhe të mbajnë higjienën personale.
Ajo ka bërë me dije se e vetmja mënyrë për ta shmangur këtë virus është mbrojtja.
“Prej 6 muajsh po bashkëjetojmë me një virus të padukshëm, shumë virulent dhe me një topizëm pulmonar, me një sjellje bizare. Atëherë, në mungesë të një vaksine për të luftuar këtë virus mbetet opsioni i vetëm, mbrojtja. Mbrojtja është në tre forma.
Së pari, vendosja e një maske e cila duhet të jetë shumë e puthitur në fytyrë. Së dyti është distancimi fizik. Dhe së treti është higjiena personale dhe ajo territoriale. Duhet të jemi korrekt me higjienën e trupit, por edhe në territor. Sepse jetojmë në komunitet, dhe komuniteti ka disa rregulla për pastërtinë e cila është në dorë të vetë banorëve apo të vetë kalimtarëve.
Në shërbimin onkologjik falë masave shumë të rrepta që janë marrë, deri tani nuk kemi pasur asnjë rast pozitiv me koronavirus. Kjo falë masave shumë të rrepta që janë marrë në shërbimin tonë duke filluar që nga hyrja e njerëzve të cilët detyrimisht do të jenë me maska të puthitura mirë, në matjen e temperaturës në hyrje të spitalit. Thelbi që arma e vetme është mbrojtja, e cila është një armë që nuk ka kosto. Është një armë lehtësisht e zbatueshme”, thotë mjekja.
Mesazhi i saj është shpërndarë nga ministrja e Shëndetësisë Ogerta Manastirliu.
