Presidenti Ilir Meta nuk ka preferuar të japë asnjë koment mbi protestën e 21 Janarit me katër viktima e cila sot mbush plot 11 vite. Nga Korça, Meta tha se sot është një ditë për të dhënë mesazhe mbi kulturën e artin si dhe për ta vlerësuar atë.
I pyetur nga gazetarët shkarkimin nga posti i tij si President, Meta tha se në fakt mezi po e pret 24 korrikun, ditën që edhe i mbaron mandati. Me humor ai shtoi se nuk i duron dot truprojat e makinat e policisë që i shkojnë pas, bazuar në protokoll. Ndërsa tha më tej se sapo të heqë kostumin e Presidentit, do të futet në betejë e zgjedhje, pasi sipas tij, populli i 2 marsit mezi pret që ai të marrë drejtimin e Lëvizjes Socialiste për Integrim.
25 prillin, Kreu i Shtetit e konsideroi ndeshje të shitur e jo të fituar duke mos lënë pa thumbuar drejtpërdrejt kryedemokratin Lulzim Basha. I pyetur nëse do të ketë një koalicion LSI-Berisha për zgjedhjet e pjesshme lokale të 6 marsit, Meta nuk preferoi të përgjigjej.