Silva Bino, shefe e epidemiologjisë në Institutin e Shëndetit Publik, ka shpjeguar sot vendimin e qeverisë për mos lejimin e muzikës pas orës 20:00. Në një intervistë në ABC News, Bino u shpreh se masat e marra së fundmi janë pë të shmangur grumbullimet.
Më tej ajo ka thënë dhe se çfarë ndikimi ka ndalimi i muzikës pas orës 20.00 të darkës, ku shpjegoi se si shembull janë marrë edhe eksperiencat e vendeve të tjera, që mund të kenë ndaluar konsumimin e alkoolit, apo mund të kenë vendosur kufizime jo të drejtpërdrejta me grumbullimet, por që shkaktojnë grumbullime.
“Disa ekspertë, duke parë eksperiencën e shumë vendeve, ndalojnë të gjitha ato që bëhen sebep i grumbullimit të njerëzve. Këto janë për të penguar grumbullimin e njerëzve. Grumbullimi çon në shtimin e rasteve, edhe pastaj me pasojë vdekjen. Kjo mund të mos jetë për të rinjtë, por është për ata që infektojnë të rinjtë”, u shpreh Bino.
