Manastirliu: Nga shtatori do të dyfishojmë numrin testeve për COVID.
Në vjeshtë, vendi ynë por edhe mbarë Evropa po përgatiten për një valë të dytë të COVID-19. Ministrja e Shëndetësisë, Ogerta Manastirliu në kuadër të marrjes së masave për parandalimin e përhapjes masive të coronavirusit gjatë dimrit, thotë se, një nga masat është dyfishimi i testimeve.
“Duke filluar nga muaji shtator, kapacitetet e testimit do të rriten me dy herë, duke shtuar ekipet e terrenit, infrastrukturën e nevojshme dhe kapacitetet laboratorike. Po bëjmë çdo përpjekje që kemi në dorë, për t’u përgjigjur situatës së pritshme në vjeshtë-dimër. Do të zgjerohen kapacitetet, me pajisje të reja. Jo vetëm do të rrisim kapacitetet në disa laboratorë publikë në vend, por edhe në bashkëpunim me sektorin jopublik”, tha znj. Manastirliu.
Gjithashtu duke filluar nga muaji shtator do të rriten me 30% edhe stafet e epidemiologëve dhe ndihmës epidemiologëve në terren. Ministrja tha se, pjesë e kësaj strategjie do të jetë dhe vaksinimi kundër krimit për kategoritë e rrezikuara.
“Pjesë e strategjisë së vjeshtë-dimrit është edhe shumëfishimi i vaksinave falas kundër gripit, për të mbuluar të gjithë grupet e riskuara, të përcaktuara nga ekspertët e ISHP, që nga personeli shëndetësor, tek të moshuarit, edukatorët, arsimtarët, fëmijët 2-5 vjeç, etj, me vaksinën e gripit falas”, deklaroi ajo.
Për situatën aktuale, znj. Manastirliu tha se bilanci nuk mund të bëhet në mes të luftës dhe foli për numër të ulët të vdekjeve dhe infektive në krahasim me vendet e tjera të rajonit.
“Nëse shohim edhe situatën e dy javëve të fundit, Shqipëria është ndër vendet me numrin më të ulët të rasteve pozitive dhe të fataliteteve në rajon, por këto janë bilance që nuk duhen bërë në mes të luftës”, përfundoi ministrja e Shëndetësisë.
Gjatë javës së fundit, Instituti i Shëndetit Publik në Shqipëri nuk ka kryer më shumë se sa 630 teste në ditë për COVID-19. Shqipëria bashkë me Kosovën, janë dy vendet që gjatë pandemisë kanë kryer numrin më të ulët të testimeve.
Tri muajt e para të pandemisë, numri i testeve ditore të kryera nga ISHP nuk i kalonte 300 edhe pse sugjerimi i Organizatës Botërore të Shëndetësisë ishte testimi i sa më shumë personave për të gjurmuar dhe parandaluar përhapjen e virusit.
