Kontrata koncesionare për shfrytëzimin e Portit të Limionit në Sarandë tashmë është vulosur. Sipas cna.al Konsorciumi “Kastrati” dhe “Edil Al”, do të kenë të drejtën e shfrytëzimit të tij për 35 vite, ndërsa afro dy vite më parë, qeveria kaloi këtë port me qira me të drejtë 20 vjet tek kompania Concord Investment, një procedurë që u kundërshtua fort nga operatorët e tregut të karburanteve ndaj të cilëve nisi të aplikohej një tarifë për të aksesuar portin ku bëhet furnizimi me karburante i jahteve.
Kompanitë që janë shpallur fituese për koncesionin janë zotuar se do të investojnë në këtë port turistik dhe shërbimi 1.3 miliardë lekë, ndërsa me vendimin e publikuar në Fletoren Zyrtare, totali i vlerës së investimeve në pasurinë shtetërore, sipas planbiznesit, shkon rreth 6,2 miliardë lekë pa TVSH dhe do të punësohen aty 35 punonjës.
Sa i përket afateve, kontrata parashikon që objekti të përfundojë brenda 4 vjet nga data e marrjes në dorëzim dhe nxjerrjeve të lejeve përkatëse për punimet. Sipas planbiznesit të paraqitur, ky investim do të realizohet si vijon:
– Planifikohet që në vitin e parë të përfundohen të gjitha projektet, si edhe punimet paraprake për rregullime të terrenit dhe ngritjes së kantierit. – Në vitin e dytë parashikohet mbërritja në kuotën në shumicën e godinave, si dhe përparim më i mirë me njësitë vila hotelerie;
– Në përfundim të vitit të tretë është parashikuar përfundimi i sistemimeve për të gjitha ndërtimet;
– Në vitin e katërt do të punohet me fasada, rifinitura dhe interiore, në mënyrë që kompleksi turistik të jetë operativ. DdVm
