Ja bilanci i ngjarjes në Laç!

Dy viktima dhe një i plagosur. Ky është bilanci i atentatit të djeshëm në sheshin e një hoteli në Laç. I vdekur në vend ka mbetur, Bujar Lika. Ndërsa në spital disa orë më vonë ka ndërruar jetë, 53-vjeçari, Paulin Gjergji. Ndërkohë në gjendje të rëndë është Kreshnik Tusha, 21 vjeç. Të shtëna në Laç, pak çaste para mesnatës! Me armë zjarri është ekzekutuar biznesmeni, Bujar Lika, 37 vjeç, i cili njihej edhe si Bujar Hasani. Prej të shtënave në sheshin e hotelit “A.A”, që ndodhet në autostradën Mamurras-Lezhë, në afërsi të kryqëzimit të Gjormit, mbetën të plagosur edhe dy persona të tjerë. Bëhet fjalë për Paulin Gjergjin 53 vjeç dhe Kreshnik Tushën, 21 vjeç.
Pasi u sollën me urgjencë në spitalin e Traumës në Tiranë, 53-vjeçari humbi betejën me vdekjen, ndërsa i riu është në gjendje të rëndë si pasojë e një plumbi që ka marrë në këmbë.
Paraprakisht është raportuar në hotelin ku ka ndodhur krimi, është futur një person dhe ka qëlluar më armë zjarri drejt biznesmenit Lika, duke e lënë të vdekur. Dyshohet se personi që ka shtënë ndaj tij, ka qënë pikërisht 21-vjeçari Tusha. Ky i fundit dyshohet se është ndihmuar nga një tjetër person, por ende nuk është zbuluar asnjë e dhënë për identitetin e tij.  Pritet që 21-vjeçari, të arrijë që të shpëtojë për të zbardhur me pas edhe ngjarjen e plotë dhe arsyen e atentatit. F.A.