I dënuari për korrupsion Nexhmi Balla bën kërdinë me tendera duke u fshehur pas dy grave, ja më kë i ndan paratë tona
‘Ujku i vjetër’ i aferave Nexhmi Balla, biznesmen i brumit dhe bulmetit pasi u dënua nga Krimet e Rënda për afera me zyrtarë të shtetit, vijon avazin me kompaninë NELSA duke përlarë tendera të dyshimtë, fshihet pas dy grave për t’i shpëtuar ligjit
Historia përsëritet. Të dënuarit për korrupsion me tendera, pas ndëshkimit nga drejtësia për pazare me zyrtarët e korruptuar, kalojnë kompaninë në emër tjetër dhe vijojnë avazin e vjetër.
Biznesmeni i brumit dhe bulmetit, Nexhmi Balla, i dënuar nga Krimet e Rënda për korrupsion me ‘ustallarët’ e aferave në krye të burgjeve, vijon të marrë para publike nga të njëjtat duar zyrtarësh. Nexhmi Balla ka themeluar kompaninë ‘Nelsa’ me prodhim brumërash, import-eksport dhe tregtim të artikujve ushqimorë, blegtoralë, hotele, ndërtim, skrap, shkrirje metalesh etj.
Në korrik të vitit 2018, Gjykata e Krimeve të Rënda e dënoi Nexhmi Ballën me 3 vite burg për korrupsion me ish-drejtorin dhe ish-nëndrejtorin e burgjeve Artur Zoton dhe Iljaz Labin.
Nexhmi Balla, Ylber Kalaja dhe Shemsi Sinani kishin krijuar një skemë korrupsioni me krerët e burgjeve, ku paracaktonin veten si fitues të tenderave, ndërsa fitimet i ndanin sipas rolit në këtë aferë.
Në këtë rast drejtësia veproi, por vjedhja nuk është ndaluar. Katër muaj pasi u dënua, Nexhmi Balla ia kalon kompaninë në letra të besuarës së tij, Lizeta Ballës, pasi ligji për prokurimet e ndalon që një i dënuar të marrë pjesë në tendera.
Për t’i shpëtuar kësaj pengese ligjore, Balla ndërmerr këtë manovër. Më pas, vetë Lizeza Balla, për të humbur edhe më tej gjurmët, ia kalon kompaninë në letra Elsa Kamberit. Kjo e fundit është gjithashtu e besuar e Ballës, pasi ka qenë administratore e kompanisë para se të dënohej Balla.
Në këtë mënyrë, Nexhmi Balla, duke u fshehur pas dy grave, ka vijuar të marrë tendera në të njëjtën formë. Arsyeja se pse kjo kompani duhet të monitorohet ka të bëjë me faktin se ofertat e saj fituese kanë një diferencë modeste me fondin limit, çka krijon dyshime se fitimi ndahet mes Ballës dhe zyrtarit që jep tenderin, apo ndërmjetësit.
Nuk ka dyshim se në Shqipëri nuk merret tender pa ‘votuar’ tek pushtetari apo sekseri, por risku më i madh është tek personazhet që janë certifikuar si të korruptuar, pasi siç thotë populli ‘vesi del me shpirtin’.
Vetëm disa ditë më parë, NELSA ka marrë tendera nga Qendra Komunitare në Shkozë, Bashkia Përrenjas, drejtoria e Shërbimit Spitalor Bulqizë etj. Mbi 40 tendera i ka marrë vetëm nga bashkitë vitet e fundit, sidomos nga Erion Veliaj dhe Baskia e Burrelit.
Lidhjen më të fuqishme klienteliste Balla e ka në Burrel, pasi në këtë qytet ka lidhur 21 kontrata nga drejtoria e shërbimit spitalor. Arsyet se pse është fokusuar në Burrel do t’i zbardhim në vijim, duke ndjekur paratë e zyrtarëve lokalë në Mat./Pamfleti
