Kryeministri i Kosovës, Avdullah Hoti duke komentuar deklaratat e presidentit të Serbisë, Aleksandër Vuçiç, ka thënë se në çdo takim temë e vetme është njohja reciproke, në të kundërtën nuk ka normalizim të marrëdhënieve me Serbinë.
Presidenti serb ka thënë se në takimin që do të mbahet më 4 shtator në Uashington, edhe nëse merr pjesë presidenti Trump, nuk do të diskutojë për njohjen e shtetit të Kosovës.
Por sipas kryeministrit të Kosovës në çdo takim temë e vetme është njohja e shtetit të vendit tonë. “Në çdo takim që kemi tema e vetme për çfarëdo që bisedojmë, çdo gjë është në funksion të njohjes reciproke, ndryshe nuk normalizohen”, shprehet Hoti..
Ai tha se si koalicion janë unison sa i përket dialogut me Serbinë. “Si koalicion jemi plotësisht unik, ju e dini që unë kam kërkuar edhe nga opozita që të jenë pjesë e këtyre zhvillimeve po unë jam duke u angazhuar, duke punuar në bazë të kompetencave kushtetuese për të përfaqësuar shtetin e Kosovës në këto bisedime”, shprehet Hoti
