Humbi betejën me COVID-19, mesazhi prekës i shkollës për vdekjen e këngëtares fierake: Në mënyrën më të pazakontë, iku një njeri jo i zakontë.
Një mesazh prekës kushtuar mësueses dhe këngëtares së njohur të muzikës myzeqare Rainita Pupi, e cila ndërroi jetë ditën e djeshme pasi humbi betejën me COVID-19.
Përmes një postimi në rrjetet sociale, drejtoria e shkollën 9-vjeçare “Pinellopi Piro” në Fier i ka kushtuar një mesazh të ndjerë mësueses që ishte pjesë e stafit të këtij institucioni. Në mesazh thuhet se shkollës iu pre një krah i fortë dhe energjik.
Pas nje beteje të gjatë, rreth 4-javore, dhe prej tre ditësh e intubuar në një nga spitalet Covid dje këngëtarja e njohur humbi jeten. Ajo është ndare nga jeta në moshën 52 vjecare ne kryeqytet ku ishte edhe nen kujdesin e mjekeve. Kohët e fundit familjaret e saj kishin kërkuar ndihmë për mjekim më të specializuar për këngëtaren.
POSTIMI I SHKOLLES “PINELLOPI PIRO”
I pabesueshëm, por fatkeqësisht i vërtetë, lajmi i zi që morëm mbrëmë. Kolegia jonë, zëvendësdrejtore Rainita, humbi jetën në përballje me virusin kobzi, që po endet këtyre kohëve nëpër Botë. Me Rainitën, nga ky virus, shënuam të gjithë nga një humbje tonën. Të pazëvendësueshme!
Shkollës sonë iu pre një krah i fortë dhe energjik, i tillë që vështirë të zëvendësohet. Qytetit i iku një artiste energjike, e përkushtuar dhe gjithë pozitivitet, në kulmin e krijimtarisë dhe veprimtarisë së saj. Familjes i iku gruaja, nëna dhe gjyshja model, që secilin prej këtyre roleve familjare, e merrte me natyrshmërinë më të madhe. Me të njëjtën natyrshmëri sipërmerrte edhe rolet shoqërore dhe detyrimet si qytetare e angazhuar. Humbja e Rainitës është e disafishtë. I pamundur është misioni, që dhembja të përkthehet në fjalë që ngushëllojnë familjarët dhe miqtë e saj më të afërt, e megjithatë, në emër të kolektivit të shkollës i përcjellim ngushëllimet më të ndjera familjes.
Në mënyrën më të pazakontë, iku një njeri jo i zakontë. Një njeri shumë i veçantë, për ne që e njohëm. I paharruar kujtimi yt, Rainita, mike dhe kolege e dashur.
“Pinellopi Pirro” do të të kujtojë e do të ta çmojë gjatë pasionin, energjinë dhe përkushtimin që solle ndër ne, kolegë, prindër e nxënës.
