NDËRROI JETË VELO CFARKU, INTELEKTUALI ME KONTRIBUTE NË GAZETARINË DIBRANE DHE NË ARSIM
Sot, dita nisi me një lajm të keq. Në inboxin e gazetës sonë erdhi një mesash nga Andi Selaj, nipi i Velo Cfarkut, i cili na bën me dije, se shoku dhe miku ynë Velo, intelektuali me kontribute të shquara në gazetarinë dibrane, kishte ndërruar jetë! Dhimbje dhe keqardhje.
Me këtë rast familjarëve të tij-bashkëshortes, djemve, vajzave, farefisit dhe të afërmve të tij, ju përcjellim ngushëllimet e sinqerta për humbjen e njeriut të tyre dhe i sigurojmë, se e ndajmë dhimbjen me ta.
Velo Cfarku ishte vërtetë intelektuali i kohës. Rrezatonte kulturë. I rregullt dhe estetik në gjithçka. Rriti dhe edukoi djem dhe vajza me dije e kulturë, shoqërisht të dobishëm. Ai qe një qytetar model në qytetin e Peshkopisë dhe në Tiranë. Unë kisha raporte miqësore më të dhe ruaj kujtime shumë të mira, të cilat nuk është koha dhe rasti t’i rendis. Edhe këtë foto, me të cilën po ilustrojmë këtë nekrologji, e kam bërë unë me telefonin tim, para 3-4 muajsh, në një kafe këtu në lagjen tonë. Në tre libra të mi, Velo është personazh, me jeteshkrim dhe fotografi, si te: “Personalitetet e Dibrës”, “Pena e Dibrës” dhe “Historia e arsimit shqip në Dibër”, sepse ai ishte njeriu me kontribute të njohura si mësues e drejtor shkolle në Trebisht dhe në Klenjë, personalitet me kontribute në gazetarinë dibrane, si drejtues për shumë kohë i gazetës “Ushtima e Maleve”. Velo ishte jo vetëm një publicist, por edhe një shkrimtar i njohur në rrethet intelektuale dibrane e më gjerë.
Vërtetë u largua fizikisht, edhe pse nuk duam ta besojmë, por ai rron në mendjet dhe në zemrat e të afërmve dhe të njohurve të tij, në memorien gollobordase dhe dibrane, sepse la pas një kontribut të dukshëm dhe me vlera, si publicist dhe si autor i shumë kujtimeve për Dibrën dhe dibranët.
Me këtë rast, të dashur lexues, po ju përcjellim një jetëshkrim të shkurtër të të ndjerit Velo Cfarku:
U lind në fshatin Gjinovec të Gollobordës, më 5 maj 1935.
Pas mbarimit të shkollës Pedagogjike, më 1959, ka punuar si mësues në shkollën 7-vjeçare të Trebishtit.
Pastaj ka kryer edhe Institutin e Lartë Pedagogjik “Aleksandër Xhuvani”, në Elbasan, për matematikë-fizikë dhe ka punuar për disa vite si drejtor shkolle e zone në shkollën 8-vjeçare të Klenjës.
Pasi kreu edhe Shkollën e Lartë të Partisë, punoi si instruktor në Komitetin e Partisë, deri në gusht të vitit 1973, kur u emërua kryeredaktor i gazetës “Ushtima e Maleve”, detyrë të cilën e kreu deri më 1981, kur shkoi në kursin e lartë të Filozofisë, ku ndoqi mësimet deri në vitin 1982.
Në vitet 1982-1985, qe instruktor për arsim-kulturën dhe shkencën në rrethin e Dibrës.
Nga viti 1985 deri në vitin 1991, ka qenë përsëri kryeredaktor i gazetës “Ushtima e Maleve” dhe gazetës “Dibra” deri te numri 14 i saj, viti 1991.
Është dekoruar me distinktivin “Mësues i dalluar“ dhe me medaljen “Naim Frashëri” të kl.II.
Ka botuar librat : “Golloborda në optikën e kohës” (2007) dhe “Një jetë mes dibranëve” (2009), “Të parën kemi Dibrën” (2011) dhe “ Mozaik episodesh dhe ngjyrash” (2017).
I përjetshëm qoftë kujtimi i tij!
Fatos DACI