Sot, ishin drejtpërdrejt në RADIO TIRANA 1🎙📻, “60 MINUTA NË FUSHËN TIME”, 7 kampionë: PËLLUMB PIPERO, MEL OSTRENI, ARBEN HAVERI, GENC YMERAJ, ROLAND LUÇI, DRITAN ULQINAKU, ERION DASHO. Isha vetëm në studio. Të ftuarit ishin drejtpërdrejt në linjë telefonike.
MËDYSHJA E RIFILLIMIT TË FUTBOLLIT
PO, duhet të fillojë!
JO, nuk duhet të fillojë!
PËLLUMB PIPERO: Sa më shpejt të fillojë, aq më mirë është… Duke njohur dhe parë rrethanat në të cilat ndodhemi, besoj se nuk ka ndonjë rrezikshmëri që të nisë futbolli, nuk ka pengesa të mëdha dhe objektive… Për stërvitjet kam qenë i mendimit që duhej të kishin filluar më herët… Nuk do të rekomandoja tifozë për ketë vit… Sugjeroj analiza mjekësore para fillimit të kampionatit…
MEL OSTRENI: Po, sepse futbolli ka nevojë për frymëmarrje… Jo, sepse jam pak skeptik… Si do të zbatohet protokolli?… Duhet të bëhen tamponë. Të paktën një i tillë në fillim…
ARBEN HAVERI: Jo, sepse nuk dua të marr përgjegjësi juridike… Lojtaret/ët e dy ekipeve (femrat dhe të rinjtë) të Albanian Ajax School janë në 90 % të përbërjes së tyre nën 18 vjeç, me ndonjë përjashtim të rrallë. Gjë që do të thotë se nuk mund të marrim vendime për ta, por janë prindërit e tyre ata që vendosin. Mund të përfundojmë secili nga ne në ndonjë gjyq për rrezikim të jetës me paramendim dhe të përballemi me pasojat…
GENC YMERAJ: Po, duhet të fillojë. Sepse nuk ka arsye të mos fillojë… Shqipëria nuk ishte në atë valën e madhe që u godit… Duhet të fillojë se e thotë edhe Pipero, që është shqiptari më i besueshëm që nga koha e Skënderbeut🤣🤣🤣…
ROLAND LUÇI: Duhet marrë parasysh se masat drastike kufizuese ndaj një virusi të hiperbolizuar kanë çuar në një ndërprerje të gjatë të aktivitetit futbollistik dhe përgatitja fizike e futbollistëve në këto momente ka difekte të mëdha… Po ashtu kushtet në të cilat presupozohet se duhet të rifillojë kampionati (maska në pankinë, mosbërje dushi, ndalim festimi kur shënohet gol, stadiume bosh, etj), alternuar me një shfaqje sportive detyrimisht të dobët dhe në një atmosferë varreze, e kthen futbollin në një karikaturë qesharake me impakt negativ në publik… Përshëndetje do të vijnë vetëm nga shoqëritë e basteve… Prandaj them një JO për vazhdimin thjesht formal e statistikor të aktivitetit në këto kushte…
DRITAN ULQINAKU: Virulenca e COVID-19 ne grupmoshat deri në 40 vjeç është shumë e vogël dhe shumë e ngjashme me gripin e zakonshëm…
Momenti aktual mund të konsiderohet si momenti me rrezikun më të vogël të mundshëm…
ERION DASHO: Sot, njihen dy grupet më të rrezikuar ndaj COVID, personat mbi 60 vjeç dhe personat e prekur nga sëmundje të caktuara kronike… Futbollistët dhe sportistët nuk hyjnë tek asnjë nga këto kategori, prandaj nuk ka asnjë arsye të mos rinisin veprimtaritë sportive… Madje, nëse respektohen distancat, mbajtja e maskave dhe hyrje-dalja e rregullt në stadiume, edhe një pjesë e sportdashësve, le të themi me kapacitet 10 deri 30 % mund të lejohen në stadiume…
