ILIR META OFROI DORËHEQJEN NËSE I NXIRRTE TAKIMIN ME PERSONAZHIN E OFL-SË/ KA REAGUAR RAMA: ILIR ÇFARË BORXHI TË KA SHQIPËRIA?
Pak minuta pasi presidenti i vendit Ilir Meta, e sfidoi duke thënë se do të jepte dorëheqjen në rast se i zbulonte takimin me anëtarin e OFL-së, Edi Rama ka zgjedhur që të bëjë sërish retorikë, në një reagim të tijin në rrjetet sociale. Rama pyet sërish Metën, se çfarë borxhi i kanë shqiptarët, që duhet të durojnë sakëlldisjet e tij, duke përmendur dhe kujtimin e të rënëve.
Rama shkruan në Twitter:
Ilir çfarë borxhi të ka Shqipëria që të bëri kryeministër, kryeparlamentar, president dhe duhet të durojë shkallimet e tua të përditshme, që sekëlldisin jo veç të gjallët po edhe të rënët për liri të këtij vendi, të cilëve u je qepur me dekoratat e me fjalimet e tua qesharake! Kujtojmë se pak minuta më parë, Presidenti i vendit Ilir Meta, në ditën kur socialistët do të mbledhin sot asamblenë, u dërgoi një letër publike të gjithë anëtarëve të saj. Meta shprehej se ka qenë pjesë e PS-së, atëherë kur asnjë njeri nuk shkonte, kur Edi Rama hidhte baltë të zezë, mbi socialistët dhe Luftën Antifashiste Nacionalçlirimtare. Duke iu referuar akuzave të Ramës, se presidenti ka takuar persona që janë subjekt i OFL-së, Meta e sfidoi kryeministrin që të japë orën dhe datën, dhe ai do të japë menjëherë më pas dorëheqjen. “Ky njeri pa Atdhe, pa nder, pa vlera më akuzon sot se kam takuar skutave subjekte të OFL-së. I kërkoj publikisht të bëjë publik emrin, skutën dhe orën, kur e kam takuar këtë personazh të botës së krimit dhe unë do të jap menjëherë dorëheqjen”, shkruante Meta në postimin e tij.
MESAZH DREJTUAR ASAMBLESË SË PARTISË SOCIALISTE
Të dashur shoqe dhe shokë socialistë. Po ju drejtohem si një prej ish-themeluesve dhe ish-anëtarëve të parë të Partisë Socialiste, që ndihet krenar për kontributin e dhënë, jo vetëm për modernizimin e kësaj force politike, anëtarësimin e saj në Internacionalen Socialiste, por edhe për arritjet e sukseset saj në vite, veçanërisht për miratimin me Referendum të Kushtetutës në vitin 1998.
Unë hyra në Partinë Socialiste, atëhere kur nuk shkonte asnjë i ri dhe kur Edi Rama, hidhte baltë të zezë mbi socialistët dhe Luftën Antifashiste Nacionalçlirimtare. Është ky individ, të cilin PS e mori nga refugjat dhe e bëri ministër, kryetar bashkie dhe kryeministër, i cili sot ka marrë peng këtë parti dhe po e keqpërdor stemën e PS-së, për të bllokuar integrimin e Shqipërisë. Ju e dini shumë më mirë se unë, se si ky njeri i papërgjegjshëm, përjashtoi nga kjo parti profesorët dhe intelektualët më të spikatur të vendit, për t’i zëvendësuar ata me trafikantë dhe kri-minelë, të cilët ju skuqin sot nga turpi. Ky njeri pa Atdhe, pa nder, pa vlera më akuzon sot se kam takuar skutave subjekte të OFL-së. I kërkoj publikisht të bëjë publik emrin, skutën dhe orën kur e kam takuar këtë personazh të botës së kr-imit dhe unë do të jap menjëherë dorëheqjen.
Përndryshe, nëse nuk e bën këtë gjatë punimeve të Asamblesë së Partisë Socialiste, jam i detyruar të merrem çdo ditë me të dhe t’u faktoj shqiptarëve, lidhjet e tij të tmerrshme me botën e kr-imit, dëmet ndaj çështjes kombëtare, dhe nuk do t’i ndahem derisa ta përzemë së bashku edhe nga Partia Socialiste. Çdo ditë do e ftoj në debat televiziv, në çdo studio që do zgjedhë ai, dhe me çdo gazetar që preferon ai. Në pritje të reflektimit! Të dashur shoqe dhe shokë socialistë, Ju uroj suksese në punimet e sotme të Asamblesë së PS. I juaji si gjithmonë, Me korrektesë dhe mbajtje fjale ILIR META!
