Ndërsa na ndajnë të paktën tetë muaj nga zgjedhjet e ardhshme parlamentare, kryeministri Edi Rama, në nisje të këtij sesioni politik, kritikoi deputetët dhe kërkoi prej tyre që të ndezin motorët për të siguruar një vend në listën e kandidatëve.
“Gjithëkush këtu pa asnjë dallim, e ka potencialin për të qenë pjesë e skuadrës 2021, por askush pa asnjë përjashtim nuk e ka të garantuar vendin në skuadër, atë do ta fitojë përditë deri në fund pa nëse dhe pa por,” – u shpreh kryetari i Partisë Socialiste.
Nga Elbasani teksa zhvilloi një mbledhje me grupin parlamentar socialist, Rama kërkoi një mandat të tretë qeverisës.
“Shqiptarët sot nuk e kanë një alternativë se sa mua dhe se sa ju, që na vunë në krye të vendit tre vite më parë, këtë ata e dinë dhe shumica e tyre nuk e diskuton,” – shtoi më tej Rama.
Përpara deputetëve, kryesocialisti nuk la pa shigjetuar edhe kundërshtarët e tij politik.
“Ata janë humbës kronikë, që më mirë se çdo gjë tjetër dinë të gjejnë rrugën e humbjes,” – ironizoi më tej kryetari i PS-së.
Gjatë mbledhjes, Rama iu ka komunikuar deputetëve edhe ndryshimet në drejtimin politik të partisë në disa qarqe në vend.
Newsalbania.al ka mësuar se Rama ka vendosur të marrë në dorë drejtimin politik në qarkun e Durrësit, pas largimit të Vangjush Dakos. Ndërsa në Shkodër ka caktuar Ilir Beqajn, e në vendin e tij në Kukës është caktuar Safet Gjici. Ndërsa në qarkun e Lezhës rikthehet në drejtimin politik të Partisë Socialiste, Lindita Nikolla.
Ra në sy që disa ministra që mbajnë poste të rëndësishme nuk morën përgjegjësi politike duke lënë të hapur zërat per ndryshime të mundshme në qeveri, që deri më sot nuk janë pranuar e as përgënjeshtruar nga kryeministri