Vrasje e dyfishtë tronditi gjatë orëve të mbrëmjes Shqipërinë. Dy vëllezër mbetën të vrarë me armë zjarri në Gramëz të Krujës. Mësohet se viktimat janë Gramoz Bardhi 34 vjeç dhe Xhentil Bardhi 24 vjeç. Dy vëllezërit u qëlluan me kallashnikov, teksa ndërruan jetë rrugës për në spital.
Ndërkohë, policia njofton se ka identifikuar autorin që ekzekutoi dy vëllezërit Bardhi. Bëhet fjalë për Roland Pulën, 32 vjeç nga Kruja. Ngjarja e rëndë ndodhi pas një sherri në një lokal mes dy vëllezërve dhe Roland Pulës.
Sipas burimeve tw newsalbania.al, policia ka gjetur të braktisur makinën e autorit të ngjarjes në vendin e quajtur pompat e ujit në Gramëz. Sipas të dhënave, vëllezërit Bardhi dhe Pula kanë pasur konflikt të vjetër, pasi kanë plagosur njëri-tjetrin edhe më parë.
Autori i ngjarjes është person problematik, pasi është i dyshuar për grabitje dhe trafik të lëndëve narkotike. Sipas informacioneve, edhe dy vëllezërit e ekzekutuar mbrëmë ishin të skeduar nga policia për vjedhje. Aktualisht, policia vijon kërkimet për kapjen Roland Pulës.
D.D
