Merita Brama nga Fushë-Kruja ka denoncuar në dritare.net dhunën nga ish-kunati, ndërsa ndodhej në komisariat bashkë me dy djemtë e saj. Ajo kontaktoi me gazetarin e dritare.net, Isa Myzyraj dhe i kërkoi ndihmë për të shpëtuar nga dhuna e ish-kunatit Fatbardh Doçi, pasi në komisariat nuk gjeti zgjidhje.
“Jemi në Komisariatin e Fushë-Krujës. Një neglizhencë totale. Jemi tre vetë të dhunuar barbarisht nga ish-kunati im dhe nuk pyet njeri. Nuk na kanë sjellë as psikolog. Jemi familje e dhunuar. Kam kaluar tentativë vrasjeje. Tani do të na vrasë kunati.”, tregon Merita.
Gazetari: Aktualisht ku ndodheni?
Merita Brama: Jam në komisariatin e Fushë-Krujës, por nuk kemi asnjë mbështetje. Po rrimë këtu po presim.
Gazetari: Me kë jeni në komisariat?
Merita Brama: Jam me dy djemtë e mi.
Gazetari: Sa vjeç janë djemtë?
Merita Brama: Njëri 31-vjeç, tjetri 27.
Gazetarja: Kunati ka ushtruar dhunë ndaj jush sot?
Merita Brama: Po. Kam që në 2017-ën që kam urdhër mbrojtje ndaj tij. Në korrik më ka mbaruar urdhri i mbrojtjes. Të lutem hajde në komisariat, shikoje se çfarë bëhet këtu. Dhunuesi është i lirë. Dhunuesi po rri këmbë mbi këmbë në komisariat. Ne jemi të gjakosur, të copëtuar. Ma morën djalin ma çuan për ta vizituar.
Rasti i Merita Bramës nuk është i padëgjuar. Tre vjet më parë, përmes një letre publike, ajo denoncoi dhunën nga ish-bashkëshorti, Isuf Doçi. Ish-burri i saj ndodhet në burg tani, për tentativë vrasjeje. Pavarësisht se ish-bashkëshorti u burgos, kalvari i vuajtjeve për Meritën, vazhdoi edhe më tej, si pasojë e dhunës nga ish-kunati, Fatbardh Doçi, nga i cili kishte edhe urdhër-mbrojtjeje./drita
