Dëmshpërblimet e tërmetit në Durrës, Shefi i Zyrës së Rindërtimit i jep lekët vëllait dhe fisit… qytetarët presin radhën që prej muajit mars, Valentin Stanaj u përfshi edhe në kolaudimin fiktiv të “përbindëshit” Kamelia në Golem

Vjeshta po troket në dyert tona, e po ashtu edhe në çadrat e të gjithë banorëve që ende nuk kanë restauruar shtëpitë e tyre të dëmtuara nga tërmeti. Por, janë të shumtë ata që ende nuk kanë marrë dëmshpërblimet për banesat e tyre. Janë të shumtë qytetarët që denoncojnë për vonesa, cilësi të dobët të riparimeve, apo favorizime.
I tillë është edhe rasti me të cilin do t’ju prezantojmë sot.
Erald Stanaj, një aplikues për dëmshpërblim nga dëmtimi që tërmeti ka bërë në banesën e tij, ka aplikuar dy javë më parë për të marrë fondin. Stanaj, do të duhet të ishte në radhë për të marrë dëmshpërblimin, por siç bëjnë me dije, qytetari në fjalë e ka zgjidhur problemin e tij.
Aplikuesi në rajonin 5., në Durrës rezulton se është kualifikuar megjithëse ka bërë aplikimin ndër të fundit, ndoshta falë edhe një rastësie.
I vëllai, Valentin Stanaj, është kryekoordinator i Zyrës së Rindërtimit në Durrës. Në kohën kur qytetarët përballen me burokracitë, i vëllai i shefit arrin t’i kalojë këto pengesa.
Por siç realizohen punët në Shqipëri, “ku ka të ushqehet njëri, ka edhe tjetri“, e kësisoj në listën e fituesve të parakohshme që marrin paratë e rindërtimit, nuk është vetëm vëllai i Valentin Stanajt, por edhe xhaxhai. Luigj Stanaj, siç shihet në foto, ka fituar megjithëse ka aplikuar me vonesë.
Burimi: D.al